Kuri uyu wa gatatu hari hateganyijwe imikino itanu muri shampiyona y'u Rwanda ku munsi wayo wa 17.
Umukino w'umunsi ni umukino wari wahuje ikipe ya AS Kigali na Kiyovu Sports, ukaba ari umukino wabereye kuri stade ya Kigali i Nyamirambo.
Kiyovu Sports yari yicaye ku mwanya wa kabiri wa shampiyona y'u Rwanda yashakaga gukomeza kotsa igitutu APR FC yari ku mwanya wa mbere ku rutonde rw'agateganyo rwa shampiyona.
Mu mukino ubanza ikipe ya AS Kigali yatsinze Kiyovu Sports ibitego bine byose ku busa, uyu ukaba wari umwanya wo kwihimura kuri iyi kipe y'abanyamujyi.
Igitego rukumbi cyabonetse muri uyu mukino, cyabonetse ku munota wa 2' winyongera igice cya mbere kiri kurangira, kikaba cyabonetse gitsinzwe na Mugenzi Cedric maze Kiyovu Sports ijya kuruhuka iyoboye umukino.
Mu gice cya kabiri AS Kigali yagerageje kwishyura ariko ahubwo irushwa imbaraga irokoka ibitero byinshi by'abasore ba Kiyovu Sports byashoboraga gutanga ibitego.
Ku munota wa 80' nibwo myugariro Ishimwe Christian yahaye umupira umunyezamu Bate Shamiru, agiye kuwufunga afunga inzoka maze umupira awufata n'intoki ugana mu izamu. Shamiru yahise ahabwa ikarita itukura ndetse benshi banemeza ko umupira wari warenze umurongo ariko umusifuzi yemeza ko batera kufura.
Bigirimana Abedi yahise arekura umupira neza ariko umupira ukubita poto uvamo, ndetse umukino urangira ari igitego kimwe cya Kiyovu Sports ku busa bwa AS Kigali.
Ibintu byakomeje kuba uburyohe ku bafana ba Kiyovu Sports kuko APR FC yatsindiwe i Musanze igitego kimwe ku busa,bigatuma hagati ya APR FC na Kiyovu hasigaramo ikinyuranye cy'amanota abiri gusa.
Indi mikino yabaye uyu munsi:
Gasogi United 0-1 Mukura Victory Sport
Etoile de L'Est 1-1 Gicumbi FC
Marines 1-2 Gorilla FC
Musanze FC 1-0 APR FC
Kiyovu Sports yatsinze AS Kigali
Uko urutonde rwa shampiyona ruhagaze
