Jude Bellingham akomeje kubaho ubuzima bw'inzozi ze kuva yava muri Borussia Dortmund aguzwe miliyoni 115 z'amapawundi yerekeza muri Real Madrid mu mpeshyi ishize.
Uyu musore akomeje kuba umukinnyi w'ingenzi cyane muri Real Madrid ya Carlo Ancelotti, ku munsi w'ejo akaba yarongeye guhesha iyi kipe amanota atatu atsinda ibitego bibiri bagatsinda FC Barcelona bayiturutse inyuma.
Mu minota itandatu gusa Barcelona yari iyoboye umukino kubera igitego cya Ilkay Gundogan, ndetse ibona n'amahitwe yashoboraga kubyara ibitego bibiri ariko ku bw'amahirwe make imipira iterwa ipoto.
Bellingham w'imyaka 20 yafashe Barcelona mu biganza bye ashyira Real Madrid ku bitugu, ku munota wa 68 atsinda igitego cyo kwishyura ku ishoti riremereye yarekuriye hanze y'urubuga rw'amahina.
Igitego cyo kwishyura cya Bellingham cyahinduye umukino
Ntiyarekeye kuko mu minota y'inyongera yatsindiye Real Madrid igitego cya kabiri, bigatuma abafana ba Real Madid basenderwa n'umunezero mu gihe aba Barcelona bo bari bameze nkabatewe ikinya.
Uyu musore w'umwongereza amaze gutsinda ibitego icumi muri La liga bingana n'imikino amaze gukina muri iyi shampiyona.
Ibi biruta ibitego Zinedine Zidane yigeze atsindira Real Madrid mu mwaka we mwiza kuruta indi yose. Umwaka w'imikino Zidane yatsinzemo ibitego byinshi muri Real Madrid ni 2002-03 na 20005-06, aho hose yatsindaga ibitego ikenda.
Ubaze ibitego byose Bellingham amaze gutsindira Real Madrid ugashyiramo na UEFA Champions League byose hamwe ni ibitego 13 mu mikino 13, akaba yaranatanze imipira itatu yavuyemo ibitego.
Muri El Clasico yo kuri uyu wa Gatandatu, imipira 45 muri 49 Bellingham yatanze yabashije kugera ku bo yashakaga kuyiha. Uyu musore yagerageje amashoti abiri muri uyu mukino yose avamo ibitego.
Nyuma y'uyu mukino, umutoza Carlo Ancelotti nawe ukomeje gutangazwa n'uko Bellingham ari kwitwara, yashimagije uyu musore anavuga ibitego atekereza azatsinda.
Ancelotti ati:"Ashobora gutsinda ibitego 20 cyangwa 25 byoroshye. Ntabwo dufite mu mutwe niba ari utsinda ibitego(scorer) cyangwa umwataka.
"Ari gutsinda ibitego, ariko dutegeteje natwe twese gutsinda ibitego Bellingham akina nk'abantu bakanyujijeho. Afite imyitwarire myiza cyane. Ntabwo twashakaga kunganya, igitego cye cyo kwishyura cyahinduye uko umukino wagendaga.
"Kuva ubwo twari dufite gukinera n'imbaraga zirenzeho batangira kutwereka intege nke(Barca); kugeza icyo gihe bari babaye beza kuturusha."
Iyi ntsinzi yatumye Real Madrid ihita yongera gufata umwanya wa mbere ku rutonde rw'agateganyo rwa La liga aho ifite amanota 28 inganya na Girona, mu gihe FC Barcelona yo yagumye ku manota 24.
Jude Bellingham yabaye intwari y'i Madrid
