Hari umuraperi muri America wishwe yasohokanye n’umukunzi we

Hari umuraperi muri America wishwe yasohokanye n’umukunzi we

 Sep 13, 2022 - 09:15

Umuraperi wo muri Leta Zunze Ubumwe za America PnB Rock yitabye Imana nyuma yo kuraswa ubwo yari yasohokanye n’umukunzi we.

Mu ijoro ryakeye tariki 12 Nzeri 2022 muri Leta Zunze Ubumwe za America mu mujyi wa Loss Angeles umuhanzi Rakim Hasheem Allen wamamaye ku izina rya PnB Rock yitabye Imana nyuma yo kurasirwa muri restaurant ya Roscoe aho yari yasohokanye n’umukunzi we.

Nk’uko tubikesha ikinyamakuru TMZ, amakuru avuga ko uyu muhanzi uzwi mu ndirimbo “Selfish”, kuri uyu mugoroba wo ku wa mbere, uyu muraperi yasohokanye n’umukunzi we Steph Sibounheuang banabyaranye abana babiri hanyuma ubwo bari mu byishimo nibwo haje igisambo kirasa uyu muhanzi bigaragara ko byari byagambiriwe.

Akimara kuraswa yahise ajyanwa kwa muganga igitaraganya ariko nyuma y’amasaha make aza kwitaba Imana ku myaka 30 y’amavuko.

Kugeza ubu umugizi wa nabi ntaramenyekana ariko abakora muri restaurant aba bombi bari basohokeyemo babashije gutanga amakuru ashobora gufasha police yo mu mujyi wa Los Angeles.

PnB Rock yari umwe mu bahanzi bafite amazina manini muri America, asize album ebyiri ziri mu zakunzwe cyane arizo “Catch These Vibes" yakoze muri 2017 na “TrapStar Turnt PopStar." yasohoye muri 2019. Uyu muhanzi yari yarakoranye indirimbo n’abahanzi bakomeye ku Isi barimo 2 Chainz, Kodak Black, Ed Sheeran, Chance the Rapper, Young Thug n’abandi.

Mbere yo kwitaba Imana, PnB Rock yashyize amashusho kuri Instagram ye agaragaza ko asohokanye n’umukunzi we babyaranye abana babiri aribo Milan na Xuri.

PnB Rock mbere yo kwitaba Imana yari aryohewe n'urukundo hamwe n'umukunzi we babyaranye kabiri.