Ikipe y'igihugu ya Senegal iherutse gutsinda ikipe y'igihugu ya Misiri, maze itwara igikombe cy'Afurika ku nshuro yayo ya mbere nubwo byasabye kwitabaza penariti.
Waruziko se Igikombe cy'Afurika ari kimwe mu bikombe bitanu bihenze ku isi!? Iki gikombe cyiza imbere y'ibikombe bikomeye nka UEFA champions League, Premier League n'ibindi bikinwa mu mupira w'amaguru.
Tugiye kurebera hamwe ibikombe(ibihembo) bitanu bitangwa mu marushanwa atandukanye y'umupira w'amaguru bihenze kurusha ibindi. Aha kuvuga ko gihenze ni igikombe ubwacyo, si amafaranga ahabwa uwagitsindiye.
5.Serie A - £46,000
Igikombe gitangwa muri Serie A nicyo gikombe cya shampiyona gihenze(Net-photo)
Igikombe cya Serie A ni igikombe gihabwa ikipe yabaye iya mbere mu mwaka w'imikino muri shampiyona y'Ubutariyani, kikaba gikunze no kwitwa Coppa Companioni d'Italia cyangwa Scudetto.
Iki gikombe cyakozwe bwa mbere mu mwaka 1960, gikorwa n'umunyabugeni w'umutariyani witwa Ettole Calvelli. Ariko cyaje kuvugururwamo gake mu 2015 ngo kigirwe kinini bisabwe n'ibitangazamakuru.
Nubwo shampiyona ya Premier League ari shampiyona ikize ku isi, ariko igikombe cya Serie A nicyo gikombe cya shampiyona gihenze kurusha ibindi kuko gihagaze ibihumbi 46 by'amapawundi.
4.Igikombe cy'Afurika - £115,000
Igikombe cy'Afurika kiri mu bikombe bihenze muri ruhago(Net-photo)
Kuva iki gikombe cyatangira gukinirwa mu 1957 hamaze gukoreshwa ibikombe bitatu bitandukanye.
Ikipe y'igihugu ya Ghana yahawe uburenganzira bwo kujyana igikombe cya mbere burundu ubwo yagitwaraga ku nshuro ya gatatu, maze hahita hakorwa ikindi mu 1980 nacyo kiza kubikwa na Cameroon mu 2000.
Iki gikombe ni igikombe cya kane gihenze muri ruhago kuko gihagaze ibihumbi 115 by'amapawundi.
3.Ballon d'Or - £430,000
Lionel Messi yahawe Ballon d'Or zirindwi(Net-photo)
Iki ni igihembo gitangwa n'ikinyamakuru cyitwa France Football, kigahabwa umukinnyi witwaye neza kurusha abandi mu mwaka.
Iki gihembo cyakozwe bwa mbere mu 1956, kikaba gitangwa buri mwaka ndetse ubu kikaba ari igihembo cyubashywe cyane mu mupira w'amaguru.
Iyi Ballon d'Or ipima ibiro 12 iherutse kwegukanwa na Lionel Messi ku nshuro ya karindwi. Bivuze ko abitse miliyoni zisaga 3 z'amapawundi mu bihembo bya Ballon d'Or yatwaye.
2.FA Cup - £1 Million
FA Cup niryo rushanwa rikuze cyane muri ruhago ku isi(Net-photo)
iki ni igikombe gitangwa mu irushanwa rimaze igihe kinini kurusha andi marushanwa yose mu mupira w'amaguru ku isi.
Iki gikombe cyakozwe bwa mbere mu 1871 gitwara miliyoni 20 z'amapawundi ariko kiza kwibirwa muri Birmingham book shop maze FA ihitamo gukora igikombe gishya.
Byatwaye amasaha 250 ngo hakorwe iki gikombe gishya. Iki gikombe gipima ibiro bitandatu cyongeye gushyirwa hanze mu 1911 mu isura nshya.
Iki gikombe gihagaze miliyoni imwe y'amapawundi kikaba kandi igikombe cya kabiri gihenze muri ruhago y'isi kugeza kuri uyu munsi.
1.Igikombe cy'isi(World Cup) - £14 Million
Igikombe cy'isi nicyo gikombe gihenze muri ruhago(Net-photo)
Ntabwo bitunguranye kubona irushanwa rifatwa nk'irya mbere muri ruhago ari naryo ritanga igikombe gihenze kurusha ibindi byose bitangwa mu marushanwa y'umupira w'amaguru.
Igikombe gitangwa ubu cyatangiye gukoreshwa mu 1974 ubwo igikombe cya Jules Rimet cyari gihagaritswe mu gukoreshwa. Nyuma y'uko Brazil yari yatwaye igikombe cya gatatu imyaka ine mbere yaho.
