Lionel Messi ni umwe mu bakinnyi bakomeye banyuze mu ikipe ya FC Barcelona ayikinira imyaka 17, byatumye abafana benshi b'iyi kipe bamufata nk'umukinnyi w'ibihe byose.
Ni benshi batekerezaga ko Messi ashobora kuzasoreza umupira w'amaguru muri iyi kipe yari yarakiriyemo, ariko byaje gutungurana yerekeza mu ikipe ya PSG mu 2021 kubera ibibazo by'ubukungu byari muri FC Barcelona.
Deco avuga ko Lionel Messi azagaruka i Barcelona aje gukina umukino wo gusezera abafana b'iyi kipe, gusa ntiyavuze igihe uyu mukino uzabera.
Ati:"Azakina umukino wo gusezera i Barcelona ariko igihe ibyo bizabera ntabwo tukizi. Azahora ari umukinnyi w'ikitegererezo mu mateka y'iyi kipe. Ikipe yagize abakinnyi bakomeye nka Johan Cruyff, Ronaldo, ariko ashobora kuba arenze abo bose."
Perezida wa FC Barcelona Joan Laporta yigeze kuvuga ko umukino wo gusezera kwa Lionel Messi i Barcelona ushobora kuzaba mu Ugushyingo 2024.
Icyo gihe Laporta yavuze ko yazishimira kuba Messi yazaba ahari ubwo stade Spotify Camp Nou izaba itahwa mu 2024 nyuma yo kuvugururwa. Iyi stade izuzura neza mu 2026 ariko mu 2024 nibwo FC Barcelona izongera kuyikiniraho.
Lionel Messi yifuzaga kugaruka muri FC Barcelona mu mpeshyi ishize ubwo yari amaze imyaka ibiri muri PSG ariko byarangiye yerekeje muri Inter Miami yo muri Major League Soccer.
Mu mwambaro w'iyi kipe, Messi yatsinze ibitego 672 anatanga imipira 303 yavuyemo ibitego, mu mikino 778. Muri iyi kipe kandi yabashije gutwara ibikombe 10 bya La Liga, birindwi bya Copa del Rey ndetse na bine bya UEFA Champions League.
Deco abona Messi ariwe mukinnyi wa Barca w'ibihe byose
