Ku gicamunsi cyo kuri uyu wa Gatandatu nibwo hari hateganyijwe umukino wari guhuza Manchester United na Brighton&Hove Albion ariko wamaze gusubikwa.
Ikibuga cy'imyitozo cya Manchester United cyitwa Carrington nacyo cyiraba gifunzwe ku yindi nshuro mu rwego rwo kwirinda ubwandu bwa covid-19 yihinduranyije ikomeje kugaragara muri Manchester United.
Ubutumwa bwa Manchester United bwagiraga buti:"Turemeza ko umukino wacu wa Premier league wari kuduhuza na Brighton&Hove Albion ku wa Gatandatu saa 12:30 GMT wasubitswe ukazakinwa ikindi gihe.
"Ubuzima bw'abakinnyi bacu n'abakozi ni cyo cy'ibanze.
"Kubera umubare w'abakinnyi n'abafana uhari w'abanduye covid-19, nta yandi mahitamo twari dufite usibye gusaba ko umukino wakwimurwa.
"Premier league yafashe umwanzuro wo gusubika uyu mukino igendeye ku nama y'abashinzwe ubuzima.
"Ndetse turaba duhagaritse ibikorwa byose bibera ku kibuga cy'imyitozo cya Carrington kugira ngo tugabanye abakomeza kwandura."
Amakuru yakomeje kuvuga ko abantu 19 bari bagaragaye muri Manchester United banduye ubu bwoko bushya bwa Covid-19 bwiswe Omicron, byatumye bafunga Carrington kuri uyu wa kabiri.
Ikinyamakuru Manchester Evening gitangaza ko kuri uyu wa kane kuri Carrington hari abakinnyi bake ugereranyije no kuwa Gatatu.
Ubu bwandu bushya bwa Covid-19 bukomeje gutuma imikino myinshi isubikwa muri Premier league dore ko kuri uyu wa Gatatu umukino wari guhuza Burnley na Watford wasubitswe.
Manchester United nayo umukino yari gukina na Brentford nawo warasubitswe, umukino wa Tottenham na Leicester wari kuba kuri uyu wa kane nawo wasubitswe n'indi mikino itandukanye.
Abakunzi b'iyi shampiyona yo mu Bwongereza batangiye kugira impungenge ko hari igihe byarangira ihagaritswe nk'uko byagenze icyi cyorezo cyicyiza mu mwaka wa 2019-2020.
Amategeko ya Premier league asanzwe avuga ko byibuze ikipe ifite abakinnyi bagera kuri 14 ku mukino ishobora gukina ariko ikaba ifite umunyezamu.
Gusa ku cyigendanye na Covid-19 ho ubwandu bushobora kwiyongera mu gihe ibikorwa byo guhura byakomeza nta ngamba zifashwe.
Umukino wa Manchester United na Brighton&Hove wasubitswe(Image:Telegraph)
