CAFCL:APR FC yongeye gusezererwa itarenze umutaru

CAFCL:APR FC yongeye gusezererwa itarenze umutaru

 Sep 18, 2022 - 20:13

Ikipe ya APR FC yasezerewe na US Monastir yo muri Tunisia yari yatsindiye i Huye mu mukino ubanza.

Wari umukino wo kwishyura wabereye muri Tunisia, nyuma y'umukino ubanza wabereye kuri sitade mpuzamahanga ya Huye aho APR FC yari yatsinze US Monastir 1-0 cyatsinzwe na rutahizamu Yves Mugunga.

Abakinnyi APR FC yabanje mu kibuga:

30.ISHIMWE Pierre 
13.NIYIGENA Clement
18.BUREGEYA Prince 
06.UWINEZA Placide
25.OMBOLENGA Fitina
03. NIYOMUGABO Claude
15.MUGISHA Bonheur
27. RUBONEKA J.Bosco
05.ISHIMWE Christian
17.NSHUTI Innocent
29. MUGUNGA Yves

APR FC yagiye ifite ikizere nk'ikipe ifite igitego, n'ubwo kitari kinshi kuko bari babizi ko bagiye ahantu hagoye. Imibare yari kurinda igitego batsindiye i Huye, cyangwa bakareba uko bafungura amazamu hakiri kare.

Gusa ibi ntibyabahiriye kuko US Monastir yabonye igitego hakiri kare cyane, cyatsinzwe na Zied Aloui ku munota wa kane gusa. Aha ikizere cyari kigihari ku bafana ba APR FC.

Ku munota wa 27 nibwo Houssem Teka yatsindiye US Monastir igitego cya kabiri, abo muri APR FC babona ko amazi atakiri yayandi ahubwo ko ibintu biri kugana iwa Ndabaga.

Ibyiringiro bya APR FC byarangiye ku munota wa 67 ubwo Omar Bouraoui yatsindiye US Monastir igitego cya gatatu, cyatumye abafana ba APR FC babona ko amatsinda barota n'uyu mwaka bitagishobotse.

Ku munota wa 95 Niyigena Clement yaje kubona ikarita y'umutuku. Umukino warangiye ari ibitego bitatu bya US Monastir ku busa bwa APR FC, naho ku giteranyo biba 3-1 kubera igitego APR FC yatsinze mu mukino ubanza.

Igitego cy'i Huye ntabwo cyafashije APR FC

US Monastir izahura na Al Ahly mu kiciro gikurikira