Bamporiki Edouard wemeye icyaha, yasabiwe gufungwa imyaka 20

Bamporiki Edouard wemeye icyaha, yasabiwe gufungwa imyaka 20

 Sep 21, 2022 - 11:16

Bamporiki Edouard yagejejwe imbere y’Urukiko yemera ibyaha yaregwaga hanyuma asabirwa gufungwa imyaka 20 n’ihazabu ya miliyoni 200 frw.

Kuri uyu wa Gatatu tariki 21 Nzeri 2022 nibwo Bamporiki Edouard wari Umunyamabanga wa Leta muri minisiteri y’Urubyiruko n’Umuco yitabye Urukiko rwisumbuye rwa Nyarugenge kugirango aburane ku byaha yaregwaga birimo kwakira, no gusaba indonke [ruswa].

Bamporiki yari ubwa kabiri yitabye Urukiko kuko kuwa 16 Nzeri 2021, urubanza rwari rwasubitswe kuko nta mwunganizi mu mategeko yari afite kandi amategeko abimwemerera. Kuri ubu yitabye Urukiko arikumwe n’abanyamategeko babiri aribo Me Habyarimana Jean Baptiste wari uhari imbonankubone ndetse na Me Kayitana Evode wakoreshaga uburyo bw'ikoranabuhanga bwa SKYPE.

Bamporiki yari yambaye inkweto z'umukara, ipantalo y'itisi, ishati y'umweru n'ikote ryiza rya kositimu.

Ku isaha ya saa Mbili na 19 z’igitondo [08:19], Inteko y'iburanisha yabajije niba impande zombi ziteguye [Iz'ubashinjacyaha n'abunganizi b'uregwa]. Impande zombi zasubije Perezida w’Urukiko ko ziteguye .

Perezida w’Urukiko yabajije uruhande rwa Bamporiki niba aburana ahakana cyangwa yemera icyaha maze umwunganizi wa Bamporiki, Me Habyarimana Jean Baptiste asubiza ko “Yemera icyaha”.

Ibyaha byo kwakira indonke Bamporiki aregwa.

Ikirego aregwa gishingiye ku mafaranga uwitwa Gatera Nobert yahaye Hon Bamporiki kugirango amufashe kuba hasubukurwa ibikorwa by'uruganda rwe rwari rwarafunzwe bitewe n'uko inyubako rwakoreragamo zitari zujuje ibisabwa.

Me Habyarimana Jean Baptiste wunganira Bamporiki, yavuze ko umukiriya we yemera icyaha ariko atigeze yakira amafaranga kugirango atange serivisi ahubwo icyo yakoze ari uguhuza inshuti ze kuko ibijyanye n’ibikorwa remezo atariwe byarebaga ahubwo we yahuje inshuti ye Gatera Nobert na Visi Meya w'Umujyi wa Kigali.

Umwunganizi wa Bamporiki avuga ko umukiriya we atigeze atanga serivisi kubera amafaranga ahubwo ko yahuje inshuti ze z’abacuruzi n’umuyobozi yatekerezaga ko yatanga igisubizo ariko bikarangira agize icyo akuramo n’ubwo atari akigambiriye.

Aha ni naho yahakaniye icyaha cyo gukoresha ububasha ahabwa n’itegeko mu nyungu ze bwite kuko izi nshingano atari ize.

Ubushinzacyaha bwavuze ko bwana Bamporiki yari agamije gusaba indonke kuko ari nawe watanze amakuru kugirango urwo ruganda rufungwe nyuma akaza gukoresha ububasha ahabwa n’itegeko mu nyungu ze ahuza impande z’abacuruzi n’izubuyobozi. Bityo ko yari agamije kwaka indonke.

Ubushinjacyaha bwasabiye Bamporiki Edouard wari umunyamabanga wa leta muri Minisiteri n’Urubyiruko n’Umuco, gufungwa imyaka 20 n'ihazabu ya miliyoni 200 frw. 
Inteko y'iburanisha nyuma yo kumva impande zombi, Urukiko rwisumbuye rwa Nyarugenge rwanzuye ko umwanzuro uzasomwa ku itariki 30 Nzeri 2022.

Bamporiki nta gihunga nk'uko bigaragazwa n'ifoto yitabye Urukiko yemera ibyaha aregwa ariko asaba imbabazi.

View this post on Instagram

A post shared by The Choice (@thechoice_live)

View this post on Instagram

A post shared by The Choice (@thechoice_live)