Umunya-Chile Arturo Vidal yanenze bikomeye umutoza wa Manchester United Erik Ten Hag ku buryo yasohoye Cristiano Ronaldo, arenzaho ko abatoza bafite uruhara batajya boroshya ibintu.
Ronaldo yavuye muri Manchester United muri Mutarama yerekeza muri Al Nassr nyuma yo kubura umwanya wo gukina muri iyi kipe ndetse agatangira kugirana ibibazo n'umutoza mushya Erik Ten Hag.
Arturo Vidal wamwnyekanye mu makipe nka Juventus, Bayern Munich na FC Barcelona ubu akaba akinira ikipe ya Atletico Paranaense yo muri Brazil, atekereza ko icyemezo Ten Hag yafashe kuri Ronaldo kitari gikwiye.
Vidal ati:"Uriya mutoza yaje nabi. Ni gute wakwirukana Cristiano Ronaldo? Ni kuriya bariya bagabo bameze. Niwe wari ufite ibitego byinshi arangije aramusohora. Abagabo bafite uruhara baba bagoranye."
Vidal yavuze ibivmu gihe ikipe ya Manchester United ikomeje kugorwa n'intangiro z'umwaka w'imikino dore ko ifite amanota 9 gusa mu mikino itandatu ya shampiyona imaze gukinwa, ndetse ikaba iri kugorwa cyane no kubona ibitego.
Ronaldo yagarutse muri Manchester United mu 2021 abasha gutsinda ibitego 24 mu mikino 38 yayikiniye ariko nyuma yo kuza kwa Ten Hag yatangiye kubura umwanya mu bakinnyi 11 babanza mu kibuga birangira yerekeje muri Saudi Arabia.
Ten Hag akomeje kugorwa n'intangiro z'umwaka w'imikino
