Mbappé yafunguye amazamu ku munota wa 47, nyuma y’umupira wari wagizweho uruhare rukomeye na Vinícius Junior. Mu minota y’inyongera, uyu mufaransa yatsinze igitego cya kabiri kuri penaliti, atuma Real Madrid ibona intsinzi y’ingenzi.
Uyu mukino watumye Mbappé yandika amateka, aho abaye umukinnyi wa mbere wa Real Madrid mu kinyejana cya 21 utsinze ibitego byinshi mu mikino ibiri itandukanye yakiniwe i Villarreal muri LaLiga.
Nyuma y’umukino, Arbeloa yashimye cyane Mbappé na Vinícius, cyane cyane Vinícius wari umaze igihe anengwa mu itangazamakuru kubera amakuru yavugaga ko atumvikanye neza n’uwahoze ari umutoza we, Xabi Alonso.
Yagize ati: "Ni bo bakinnyi babiri beza ku Isi. Kuko bashobora guhindura umukino mu kanya gato. Duhora tugerageza kubaha umupira kenshi. Vinícius akina ku ruhande, Mbappé akataka. Ibyabo murabizi.
"Ariko ndishimye cyane kubera uko bari kwitwara no kubera umurava wabo. Baritanga ndetse bagahatana mbere ya bose, bagakorana n’abakina hagati, bakagaragaza ubufatanye n’umurava. Ibyiza ni uko ubu biri kubagarukira mu bitego."
Umuzamu Thibaut Courtois na we yagarutse ku kaga Mbappé na Vinícius bateza amakipe bahanganye.
Yagize ati: "Ni inzozi mbi ku bwugarizi. Ushobora kubahagarika iminota 60, 70 cyangwa 80, ariko kubera ubuhanga bwinshi bafite, bahora babona icyuho."
Yakomeje avuga ko Mbappé yabonye neza icyuho ku gitego cya mbere, naho ku cya kabiri akongeramo ubuhanga bwatumye haboneka penaliti, ashimangira ko Real Madrid ari ikipe ikorera hamwe, aho buri wese atanga umusanzu mu gutsinda.
Arbeloa avuga ko Mbappé na Vinícius bahindura umukino mu kanya gato.
Mbappé yanditse amateka i Villarreal, Arbeloa avuga ko ari kumwe na Vinícius ari bo beza ku Isi.
Umwanditsi: NIYOMUKIZA Gratien
