Abategetsi barindwi b’ibihugu bya Africa magingo aya bari mu nzira berekeza muri Ukraine no mu Burusiya mu ntego yo kugerageza guhosha no kurangiza intambara.
Amashusho ku mbuga nkoranyambaga yerekanye abarimo Perezida Cyril Ramaphosa wa Africa y’Epfo, Macky Sall wa Senegal, Azali Assoumani w’ibirwa bya Coromos bari muri gariyamoshi muri Pologne bivugwa ko yari yerekeje i Kyiv.
Perezida Hakainde Hichilema wa Zambia aramukanya na Cyril Ramaphosa za South Africa ageze muri gariyamoshi. Macky Sall wa Senegal ari ibumoso, na Azali Assoumani wa Comoros ari iburyo (useka)
Bari kumwe kandi n’intumwa zihagarariye abategetsi ba Congo-Brazzaville, Misiri na Ruhakana Rugunda, intumwa yihariye ihagarariye Perezida Yoweri Museveni wa Uganda.
Iri tsinda biteganyijwe ko none kuwa Gatanu rihura na Perezida Volodymyr Zelensky naho kuwa Gatandatu bagahura na Perezida Vladimir Putin.
Perezida Cyril Ramaphosa uyoboye uru rugendo, nta ngengabihe yatanze cyangwa imirongo ngenderwaho y’ibyo bifuza ubwo yatangaza uyu mugambi mu kwezi gushize.
Ba Perezida Ramaphosa, Macky Sall, na Hakainde muri gariyamoshi berekeza i Kyiv
Abandi baziyongera muri uyu muhate wo gushaka amahoro barimo Ubushinwa, Turukiya na Papa Francis.
Icyakora rero, aba bakuru b'ibihugu bagiye gushakisha amahoro mu gihe ubu Kyiv iherutse gutangiza igitero cyayo cyo kwigaranzura Uburusiya.
