Xavi utoza FC Barcelona yafashe inzira ajya kureshya Erling Haaland mu Budage

Xavi utoza FC Barcelona yafashe inzira ajya kureshya Erling Haaland mu Budage

 Mar 4, 2022 - 03:33

Rutahizamu Erling Haaland yahuye na Xavi utoza FC Barcelona muri iki cyumweru baganira ku kuba uyu musore yajya muri FC Barcelona mu mpeshyi.

Erling Haaland byitezwe ko azava muri Borussia Dortmund mu mpeshyi ya 2022, ndetse bivugwa ko amakipe yose akomeye i Burayi yifuza uyu munya-Norway.

Kubera ikibazo cy'imvune amaranye iminsi, Haaland amaze iminsi ari i Munich mu gihe ari gukira bikaba byaranatumye abura mu mikino itandukanye ya Borussia Dortmund.

Inkuru dukesha ikinyamakuru cyandikira muri Espagne kitwa L'Esportiu, Umutoza wa FC Barcelona Xavi ndetse n'umuyobozi Jorgi Cruyff bafashe inzira bajya mu Budage kuganira n'uyu musore ugaragaza ahazaza heza mu mupira w'amaguru.

Bivugwa ko Xavi yasobanuye neza ikerekezo n'intego z'ikipe ye, kandi akereka uyu musore ukuntu yakwisanga muri uwo mushinga neza nawe bikamufasha kugera kuri byinshi.

Perezida wa FC Barcelona Joan Laporta yaganiriye n'umu-agent Mino Raiola ureberera Haaland, ubwo Raiola yagendaga aganira n'amakipe ashaka umukinnyi we. Laporta yemeza ko iyi kipe nayo yahatana mu bashobora kwegukana Haaland n'ubwo mu minsi ishize byari bizwi ko iyi kipe imeze nabi mu by'ubukungu.

Erling Haaland kandi abugwa mu makipe nka Real Madrid, Manchester City, Manchester United n'izindi, dore ko bivugwa ko uyu musore yifuza gukina muri Espagne.

Erling Haaland arifuzwa n'amakipe akomeye(Image:AFP)

Xavi yafashe iya mbere ajya kuganiriza Erling Haaland(Image:Reuters)