Virgil van Dijk yirengagije ba rutahizamu nka Cristiano Ronaldo, Erling Halaand n'abandi bahurira mu marushanwa nka Premier league na UEFA Champions League, ubwo yavugaga rutahizamu wamugoye cyane.
Uyu muhorandi afatwa nka myugariro w'igitangaza mu myaka amaze mu ikipe ya Liverpool, ndetse bikagaragarira mu ko yitwara n'ibikombe yafashije iyi kipe kwegukana.
Ubwo yari mu kiganiro yagiranye na Gary Neville mu kiganiro Overlap kuri Sky sports yabajijwe ku mwataka waba waramugoye cyane, nawe atajijinganyije avuga umufaransa Olivier Giroud wanyuze muri Arsenal na Chelsea.
Virgil van Dijk muri Overlap kuri Sky sports
Van Dijk yavuze ati:"Giroud niwe mwataka wampangayikishije cyane. Nahoraga numva mufite, ariko hari ukuntu byarangiraga abashije kudutsinda igitego. Yaba ari muri Arsenal, Chelsea cyangwa mu Bufaransa, byarangoraga atsinze.
"Umwaka twatwaye Premier league mu mwaka w'imikino 2019/2020, twatsinze Chelsea 5-2. Twari dufite 3-0 atsinda igitego, naratekereje nti 'turatsinda nta kibazo ariko aracyantsinda igitego."
Van Dijk kandi yakomeje avuga Lionel Messi na Sergio Aguero nka ba rutahizamu bateye ubwoba yahuye nabo, ndetse avuga Erling Halaand nka rutahizamu ufite buri kimwe ariko uyu myugariro ntiyavuze Cristiano Ronaldo watsinze ibitego akavagari.
Olivier Giroud yaje kwerekeza muri AC Milan (Image:REX)
Virgil van Dijk yaje kubazwa umukinnyi batigeze bakinana ariko yakwishimira gukinana nawe, avuga Kevin De Bruyne ukinira Manchester City bahanganira ibikombe mu Bwongereza.
Van Dijk ati:"Umukinnyi tutigeze dukinana ariko nakwishimira ko yaza muri Liverpool ni Kevin De Bruyne.
"Ntasanzwe, iyo aza gukina muri Liverpool, tuba twarakoze byinshi cyane birenze ibyo twakoze. Ni mwiza cyane ku mupira, ahigana umupira umwete, atsinda ibitego byinshi, afite byinshi bikenerwa n'umukinnyi ugezweho wo hagati mu kibuga n'umukinnyi w'umupira muri rusange."
Virgil van Dijk w'imyaka 31 yageze muri Liverpool mu aho yari avuye muri Southampton aguzwe miliyoni 75 z'amapawundi. Kuva icyo gihe uyu mugabo yabaye urukuta i Anfield afasha Liverpool gutwara ibikombe bikomeye birimo UEFA Champions League na Premier League.
