Polisi y'i Merseyside yemeje ko uyu mugabo yamaze gufungurwa ariko hari ibyo atemerewe. Ngo ntiyemerewe kujya mu mukino w'umupira w'amaguru uwo ari wo wose mu Bwami bw'u Bwongereza ndetse ngo agomba gusigamo intera ya kilometero hagati y'aho ikibuga cyabereyemo umupira giherereye ndetse n'aho we ari.
Uyu mukino iri rondaruhu ryabereyemo wabanje guhagararaho gato ku munota wa 29 gusa uza gukomeza nyuma y'uko Semenyo yari yatanze ikibazo ku musifuzi, Anthony Taylor, ko yakorewe iri vangura rishingiye ku ibara ry'uruhu.
Uku guhagarikwa kujya ahabereye umukino biri mu bihano bikomeye cyane bihabwa abagaragaweho n'imyitwarire y'ibyaha by'ivanguraruhu nk'ibi mu mupira w'amaguru. Bikorwa kugira ngo birinde abakinnyi bawo ndetse kugira ngo buri wese witabiriye iyi mikino yumve ko ari ahantu hatekanye kuri buri wese.
Semenyo yakorewe irondaruhu ku munsi wa mbere wa Shampiyona y'u Bwongereza ubwo ikipe ye ya Bournemouth yatsindwaga 4-2 na Liverpool FC.
Polisi y'i Merseyside yavuze ko igikomeje iperereza kuri iki kibazo ikaba iri gukorana bya hafi n'iyi kipe ya Liverpool FC uyu mufana yihebeye. Mu gihe iperereza rigikomeje, ibi bigaragaza ko irondaruhu ritazigera ribabarirwa mu mupira w'amaguru mu Bwongereza.
Hagati aho ariko, hari undi mukinnyi w'Umwirabura w'Umunya-Ghana, Christopher Antwi-Adjei, na we wakorewe irondaruhu mu ijoro ryakeye nyuma ya mugenzi we, Semenyo, na we wo muri Ghana warikorewe ku wa Gatanu ushize.
