Iminsi 444 irihiritse intambara ishyamiranyije u Burusiya na Ukraine ishyigikiwe n'u Burengerazuba bw'isi irwanwa.
Magingo ku mirongo y'urugamba biragaragazwa Ukraine ifite imbaraga nyinshi kurusha u Burusiya.
Ibinyamakuru bimwe byo mu Burengerazuba bw'isi biremeza ko ibitero bya Ukraine byo kwigaranzura u Burusiya bwatangiye.
Ni mu gihe ibindi bibihakana, ariko Perezida wa Ukraine Volodymyr Zelenskyy yatangaje ko batazigera batangaza ngo "dutangije ibitero bishya".
Ingabo ziryamiye amajanja ku mpande zombi
Ni muri urwo rwego rw'ibitero bishya, amakuru avuga ko Ukraine hari ibice yatangiye kwigarurira mu Burasirazuba bwa Bakhmut umugi umaze amezi 9 urwanirwamo.
Muri uyu mugi urwanirwa n'umutwe wa Wagnar Group ku ruhande rw'u Burusiya, umuyobozi wawo Prigozhin akaba yongeye gusaba Minisetiri y'ingabo kumwohereza intwaro nyinshi.
Nubwo bimeze gutya muri Bakhmut, muri Luhansk biremezwa ko u Burusiya bwashinze misile zirasa mu ntera ndende mu rwego rwo kwitegura ibitero bya Ukraine.
Aljazira iratangaza ko Abarusiya bashinze izo mbunda muri 90km inyuma y'imirongo y'urugamba.
U Bwongereza bwahawe gasopo
Nyuma y'uko u Bwongereza butangaje ko buzaha Ukraine amasasu ya Uranium yo gutora ibifaru by'Abarusiya, kuri ubu bongeye gutangaza bagiye kohereza misile zirasa muri km 250.
Ku bw'ibyo, u Burusiya bwahise bwihanangiriza bikomeye Leta y'u Bwongereza kutohereza izo misile.
Ku rundi ruhande, Minisitiri w'ingabo muri Ukraine Oleksii Reznikov aratangaza ko ibifaru bishya byageze muri Kharkiv mu rwego rwo kwirukana ingabo z'u Burusiya.
Muri Ukraine ibintu biri guhindura isura
Naho kandi muri Zaporizhzhia biri gutangazwa ko u Burusiya buri kwimura abaturage cyane cyane abatuye hafi y'uruganda rwa Nuclear rwa Zaporizhzhia power plant.
Muri rusange kuri uyu munsi wa 444 biragaragara ko ibintu mu minsi mike igiye kuza biraba byahindutse cyane ku mirongo y'urugamba, Ukraine ikora ibikomeye cyangwa se u Burusiya butanga isomo rya gisirikare.
