Ni umukino wo kwishyura wa 1/2 muri UEFA Champions league wabereye kuri Estadio de la Ceramica ya Villarreal, mu ijoro ryo kuri uyu wa kabiri ahamenyekanye ikipe ya mbere yageze ku mukino wa nyuma.
Liverpool yari yaje yitwaje impamba y'ibitego bibiri ku busa yatsinze mu mukino ubanza, byatsinzwe na Sadio Mane ndetse n'igitego cyitsinzwe na Estupinan ubwo bari Anfield mu cyumweru gishize
Kuri uyu munsi Villarreal yaje itandukanye n'iyo mu mukino ubanza nk'uko umutoza wayo Unai Emery yari yabiteguje abakunzi ba Liverpool ababwira ko bazahangayikira muri Espagne.
Ku munota wa gatatu gusa w'umukino Villarreal yari ibonye igitego cya mbere cyatsinzwe n'umunya-Senegal Boulaye Dia ku mupira yari ahawe na Etienne Capoue, ndetse ku munota wa 41 Francis Coquelin atsinda icya kabiri nawe ahawe umupira na Etienne Capoue.
Aha iyo umukino urangira gutya amakipe yombi yari kongerwa iminota 30 akaba yanatera penariti mu gihe bibaye ngombwa, ndetse hari n'ubwoba ko Villarreal ishobora kubona igitego cya gatatu Liverpool igataha kuko iyi kipe yakinaga neza.
Gusa abasore ba Jurgen Klopp babyitwayemo neza kuko nabo babashije kubona ibitego bitatu mu gice cya kabiri umukino ukarangira ari ibitego bitatu bya Liverpool kuri bibiri bya Villarreal.
Liverpool yasezereye Villarreal igera ku mukino wa nyuma(Net-photo)
Fabinho yatsinze igitego ku munota wa 62 ahawe umupira na Mohamed Salah, Luis Diaz wari ukinjiramo yatsinze igitego ku munota wa 67 ahawe umupira na Arnold, ndetse na Sadio Mane aratsinda ku munota wa 74 ahawe umupira na Naby Keita.
Ikipe ya Liverpool yahise yerekeza ku mukino wa nyuma ku giteranyo cy'ibitego 5-2, ikaba itegereje ikipe irarokoka hagati ya Real Madrid na Manchester City kuri uyu wa gatatu.
Umukino wa nyuma uteganyijwe kubera kuri Stade de France i Saint-Dennis mu Bufaransa, ukaba uzaba tariki 28 Gicurasi.
Ibitego bitatu Liverpool yatsinze muri uyu mukino byatumye iyo kipe igira ibitego 139 yatsinze muri uyu mwaka w'imikino uteranyije mu marushanwa yose, bikaba ari agahigo kuko nta yindi kipe irabikora kandi Liverpool iracyafite imikino muri uyu mwaka w'imikino.
