Ku munsi wa mbere wa Tour du Cameroun yatangiye kuri uyu wa Gatandatu, umunyarwanda Munyaneza Didier yabashije kwitwara neza asoza agace ka mbere ku mwanya wa kabiri.
Ni agace kegukanwe n'umunya-Cameroun Artuce Jodele Tella w’imyaka 38 usanzwe ukinira ikipe ya SNH Vélo Club yo muri Cameroun.
Artuce Jodele Tella yegukanye aka gace akoresheje amasaha abiri, iminota 51 n’amasegonda 33 mu ntera ya kilometero 123.3 asiga Munyaneza amasegonda 41.
Munyaneza Didier yitwaye neza muri Tour du Cameroun(Net-photo)
Muri aka gace bazengurukaga umujyi wa Douala inshuro icyenda, Umunya-Burkina Faso Paul Daumont yabaye uwa gatatu anganya ibihe na Munyaneza.
Muri uru rugendo, Mugisha Moise uheruka gutwara agace ka nyuma ka Tour du Rwanda ya 2022, yasoje ku mwanya wa cyenda asigwa iminota itanu n’amasegonda umunani.
Tuyizere Etienne yabaye uwa 14 asigwa 5’11”, Nzafashwanayo Jean Claude asoza ari uwa 16 asigwa 5’11”.
Abandi bakinnyi ba Team Rwanda ni Niyonkuru Samuel wabaye uwa 24 asigwa ibihe bimwe na Tuyizere kimwe na Muhoza Eric wabaye uwa 29.
Kuri iki Cyumweru tariki ya 5 Kamena 2022 harakinwa agace ka kabiri kazaba mu mujyi wa Yaoundé kajya i Ayos ku ntera ya Kilometero 118,8.
