Robert Lewandowski yagarutse ku muhigo wa Ballon d'Or

Robert Lewandowski yagarutse ku muhigo wa Ballon d'Or

 Sep 20, 2022 - 05:55

Rutahizamu Robert Lewandowski yemeza ko FC Barcelona ari ikipe yamufasha gutwara Ballon d'Or kurenza Bayern Munich yavuyemo.

Robert Lewandowski avuga ko ubu afite amahirwe menshi yo gutwara Ballon d'Or ari muri FC Barcelona, kurenza uko byari bimeze ari muri Bayern Munich.

Muri iyi mpeshyi ishize nibwo uyu mugabo w'imyaka 33 yerekeje muri FC Barelona, nyuma y'imyaka umunani yari amaze muri Bayern Munich aho yari ageze mu mwaka wa nyuma ku masezerano ye.

Uyu mugabo yatangiye neza muri FC Barcelona dore ko yatsinze ibitego 11 mu mikino 8 ya mbere amaze gukinira FC Barcelona, ndetse akaba ariwe uyoboye ba rutahizamu muri La liga kuko amaze gutsindamo ibitego 8 muri shampiyona.

Ubwo yaganiraga na Marca yaje kubazwa ku mahirwe afite yo gutwara Ballon d'Or muri FC Barcelona nyuma yo gutangira neza umwaka w'imikino gutya, dore ko yagiye imuca mu myanya y'intoki mu myaka ibiri ishize.

Lewandowski yagize ati:"Ndabizi Barcelona ari ikipe aho abakinnyi benshi bagiye bayitwara. Ndatekereza ko urugendo ari rugufi ugereranyije na Bayern."

Robert Lewandowski yaciye agahigo muri FC Barcelona ko gutangira neza kurenza abandi bakinnyi bashya bose muri iyi kipe. Lewandowski amaze gustinda ibitego 11 aho umunani muri byo yabitsinze muri La liga, undi wari waratangiye neza ni Romario wari ufite ibitego bitandatu ku mikino nk'iyi.

Lewandowski watangiye kuririmbwa n'abafana ba FC Barcelona, avuga ko atari yiteze ko batangira kumuririmba iki gihe ariko avuga ko bimushimisha akumva ari nk'aho amaze igihe kinini muri iyi kipe.

Lewandowski afite ikizere cyo gutwara Ballon d'Or(Image:Getty)