Ralf Rangnick yabwiye Manchester United ko ikwiye gukosora uburyo iguramo abakinnyi niba ishaka kugaruka ku gasongero aho yahoze mu myaka yashize.
Uyu mugabo w'umudage yatanze urugero kuri Arsenal iri ku mwanya wa kane ubu ashaka kwerekana uko ikipe ikwiye kubakwa dore ko ubu ifite amahirwe menshi yo gukina champions league nyuma y'imyaka myinshi idakandagiramo.
Rangnick yagiriye Manchester United inama yo gukosora imigurire(Net-photo)
Rangnick yagize ati:"Nyuma na nyuma ni ku bijyanye no kugura abakinnyi, kugira abakinnyi bakenewe, gusinyisha abakinnyi bakenewe mu gihe cya nyacyo, atari gusinyisha abakinnyi badakenewe mu gihe kitari nyacyo.
"Biroroshye mu mupira w'amaguru, ni kugira uburyo bwo kugura abakinnyi. Ni abahe bakinnyi koko dukeneye mu buhe bwoko bw'umukino? Noneho ukagira umutoza mwiza ushoboka ushobora kujyana nabo. Biba byiza kurushaho mu bukungu no mu kibuga, gusoza ku mwanya wa kane.
"Buri wese yakwishimira gukina Champions league buri mwaka, ndetse andi makipe yagize ubwo bunararibonye. Urebye Arsenal, urugero, ntabwo bakinnye Champions league mu myaka ishize ariko bafashe umwanzuro muzima mu ikipe ndetse birashoboka."
Manchester United ikomeje ibikorwa byo gushaka umutoza mushya aho Erik Ten Hag utoza Ajax ariwe uhabwa amahirwe menshi n'ubwo na Mauricio Pochettino wa PSG akivugwa.
Manchester United isigaje imikino ikenda yo gushaka umwanya wa kane muri Premier league cyangwa umwaka utaha ntizakine UEFA Champions league aho iratangira uyu munsi ikina na Leicester City, mu gihe iyi kipe yavuye mu bindi bikombe byose.
Arsenal ifite amahirwe menshi yo gukina Champions league(Net-photo)
Ikipe ya Arsenal niyo iri ku mwanya wa kane aho ifite amanota 54 n'umukino w'ikirarane, Tottenham ni iya gatanu n'amanota 51 naho Manchester United ikaba ku mwanya wa gatandatu n'amanota 50.
