Bikomeje kuvugwa ko umufaransa Paul Pogba yiteguye kuguma mu ikipe ya Manchester United mu gihe Ralf Rangnick ariwe waba uzakomeza gutoza iyi kipe y'i Manchester.
Ralf Rangnick yafashe Manchester United mu Ukuboza 2021 ubwo yari asimbuye Ole Gunnar Solskjaer. Pogba ntarakina atozwa na Rangnick kuko yasanze afite imvune ku kibero ariko ubu ari gukira.
Amasezerano y'uyu mufaransa w'imyaka 28 ari kugana ku musozo dore ko hasigaye amezi 5 yonyine, mu gihe yaba atayongereye mu mpeshyi yagendera ubuntu.
Byavuzwe ko kandi mu mpeshyi ishize Paul Pogba yanze amasezerano mashya yahabwaga na Manchester United bivuze ko mu kwezi kwa Gatandatu 2022 azaba yemerewe kujya mu ikipe yose yashaka.
Inkuru dukesha ikinyamakuru The sun, iravuga ko ubu Paul Pogba ari kwishimira umudage Ralf Rangnick cyane bikaba byanatuma asinya amasezerano mashya muri iyi kipe mu gihe yaba akomeje kuyitoza.
Bivugwa ko Ralf Rangnick yaba yaraganirije Paul Pogba akamwereka intumbero ze muri iyi kipe zigaragaza iterambere ryifuzwa muri iyi kipe ndetse na Pogba akaba yaranyuzwe n'ibyo biganiro.
Biravugwa ko kandi Paul Pogba ari kumvikana cyane na Ralf Rangnick kurusha uko byabaga ku batoza babanje aribo Ole Gunnar Solskjaer ndetse na Jose Mourinho.
Rangnick yumvishije Pogba ko yamwubakiraho ikipe mu myaka iri imbere ndetse akaba umukinnyi umufasha cyane no hanze y'ikibuga.
Mu minsi ishize hagiye havugwa ibibazo byinshi mu rwambariro rwa Manchester United gusa umunsi ku wundi ibibazo bigenda bigabanuka, ariko Pogba atitaweho ni umwe mu bakinnyi bateza ibibazo.
Paul Pogba ari mu minsi yo gukiruka imvune yagize mu Ugushyingo 2021 ndetse byitezwe ko azagaruka mu kibuga mbere y'uko uyu mwaka w'imikino urangira.
Mu gihe yaba agize umusozo mwiza w'umwaka w'imikino ndetse na Ralf Rangnick akagumana ikipe nk'uko Pogba abyifuza, Uyu mufaransa ashobora kongera amasezerano.
Amasezerano ya Pogba ari kugana ku musozo(Net-photo)
Paul Pogba ashobora kuguma muri Manchester United(Net-photo)
Ralf Rangnick ari kuganiriza cyane Paul Pogba(Net-photo)
