Mu itangazo ryashyizwe ahagaragara n’iri shyirahamwe, Perezida waryo Hany Abou Rida yavuze ko yasabye FIFA gukora iperereza ku musifuzi w'Umufaransa, François Letexier ndetse n'abandi basifuzi barimo n'abari bashinzwe ikoranabuhanga rya VAR, abashinja gutayikoresha mu gihe byari bikenewe.
Ibi byakurikiye umukino warangiye Argentina itsinze Misiri ibitego 3-2, nyuma yo kubatsinda ivuye inyuma mu gice cya kabiri.
Iri shyirahamwe ryavuze ko ayo makosa y'imisifurire yagize uruhare rukomeye mu gusezererwa kw’ikipe ya Misiri, isaba FIFA gukura uwo musifuzi n'itsinda rye ryose bakoranye uyu mukino mu gikombe cy'Isi nyuma y'iperereza.
Nyuma y'umukino, umutoza wa Misiri Hossam Hassan yavuze ko ikipe ye yarenganyijwe, agira ati: "Birashoboka ko bashakaga ko ikipe yegukanye igikombe cy'Isi ikomeza mu irushanwa. Birashoboka kandi ko bashakaga ko Lionel Messi akomeza guhatanira igikombe."
Nubwo Misiri yatanze iki kirego, ntibikunze kubaho ko hahindurwa ibyemezo by'abasifuzi nyuma y'imikino.
Mu gihe FIFA itaragira icyo itangaza kuri iki kirego, Argentina yamaze gukatisha itike ya 1/4 cy'irangiza, aho izacakirana n'u Busuwisi.
Umwanditsi: NIYOMUKIZA Gratien
