Kuri uyu wa Kane nibwo police yo mu mujyi wa Manchester yatangaje ko iperereza yakoraga kuri uyu musore w'imyaka 21 ritagikomeje, aho yaregwaga ibyaha birimo gukubita no gufata ku ngufu uwahoze ari umukunzi we.
Mu itangazo iyi police yashyize hanze yatangahe ko nyuma yo gusuzuma basanze atari ngombwa ko bakomeza gukurikirana uyu musore, ariko bemeza ko mu gihe abarega batanga andi makuru y'ingenzi yarebwaho.
Umukino Mason Greenwood aheruka gukinira Manchester United ni umukino yakinnyemo na West Ham United tariki 22 Mutarama 2022, akaba yarahise ahagarikwa n'iyi kipe mu gihe police yatangiraga kumukoraho iperereza.
Tariki 30 Mutarama 2022, nibwo Greenwood yafashwe na police nyuma y'amashusho y'uwari umukunzi we yacicikanye ku mbuga nkoranyambaga avuga ko yamuhohoteye.
Nyuma kandi Nike isanzwe yambika uyu musore yatangaje ko ibaye ihagaritse amasezerano yari ifitanye nawe, ndetse iza kwemeza ko yasheshe ayo masezerano.
N'ubwo byatangajwe ko ibirego yaregwaga byahagaritse, ikipe ya Manchester United yo ntacyo irabivugaho niba aremererwa guhita agaruka mu ikipe cyangwa araguma mu bihano yari arimo.
View this post on Instagram
