Nyuma yo gutsindira igitego mu mukino wa UEFA Super cup aho Real Madrid yatsinze Eintracht Frankfurt, rutahizamu Karim Benzema yabaye uwa kabiri mu bakinnyi batsindiye Real Madrid ibitego byinshi.
Igitego uyu mufaransa w'imyaka 34 yatsinze ni igitego 324 atsindiye iyi kipe yo muri Esipanye, akaba yahise arusha igitego kimwe umunyabigwi wa Real Madrid witwa Raúl González Blanco wakiniye iyi kipe mu myaka yashize.
Umunya-Portugal uyoboye uru rutonde witwa Cristiano Ronaldo, yatsindiye Real Madrid ibitego 450 mu mikino 438 yakiniye iyi kipe, mu gihe Benzema we byamusabye imikino 606 ngo ayitsindire ibitego 324.
Karim Benzema araza gukina imikino asigaje muri iyi kipe ashaka gukuraho agahigo ka Cristiano Ronaldo umurusha ibitego birenga ijana, dore ko nawe imyaka ikomeje kumujyana dore ko afite imyaka 34 mu gihe Ronaldo afite 37.
Ryari ijoro ryiza kuri Real Madrid n'abafana bayo i Helsinki muri Finland, aho David Alaba yafunguye amazamu ku munota wa 37 naho Benzema agatsinda igitego cya kabiri ku munota wa 65.
Ibi kandi byatumye Carlo Ancelotti utoza Real Madrid aba umutoza wa mbere ubashije gutwara UEFA Super cup enye zose.
Real Madrid yegukanye UEFA Super cup nyuma yo gutsinda Eintracht Frankfurt(Image:Reuters)
