Biravugwa ko umuzamu wa Manchester United Andre Onana yamaze kwemeza ko azitabira ubutumire bw'ikipe y'igihugu ya Cameroon mu gikombe cy'Afurika kizatangira muri Mutarama 2024.
Onana yari yasezeye mu ikipe y'igihugu mu mwaka ushize nyuma yo kutumvikana na Rigobert Song mu gikombe cy'isi giheruka kubera muri Qatar.
Gusa kuva uyu musore yakwerekeza muri Manchester United mu mpeshyi yongeye kwegerea ahindura ibitekerezo, ndetse yakinnye umukino wo gushaka itike y'Igikombe cy'Afurika wahuje Cameroon n'u Burundi muri Nzeri.
Kuri ubu amakuru ahari aravuga ko uyu muzamu yiteguye kuzitabira iki gikombe cy'Afurika kegereje, ndetse mu gihe Cameroon yakwitwara neza, Manchester United yakina imikino itari mike itamufite.
Igikombe cy'Afurika kizatangira tariki 13 Mutarama kikageza tariki 11 Gashyantare 2024, Manchester United yakina imikino irindwi idafite Onana mu gihe Cameroon yagera ku mukino wa nyuma.
Aha harimo imikino ine ya Premier League, imikino ibiri ya FA Cup, ndetse n'umukino wa kimwe cya kabiri wa Carabao Cup mu gihe yaba yahageze.
Ibi bikomeje guteza ikibazo muri iyi kipe kuko abazamu baba bahari muri iki gihe ari Tom Heaton na Altay Bayindir, ibi ari nabyo amakuru agarura David De Gea ahera atizwa umurindi.
Uyu munya-Espagne w'imyaka 32 yakiniye Manchester United imyaka 12 ayivamo mu mpeshyi ishize, gusa kugeza ubu nta kipe nshya arabona. Uburyo uyu mugabo amaze iminsi yitwara ku mbuga nkoranyambaga, abenshi bahamya ko ari ibimenyetso ko yiteguye kugaruka muri iyi kipe.
Onana yemeye kugaruka mu ikipe y'igihugu
