Abarwanyi ba M23 binjiye mu mujyi muto wa Kamanyola uri ku mupaka wa DRC, u Burundi n'u Rwanda mu ijoro ryo ku wa kabiri, nk'uko abahatuye babivuga.
Kamanyola iri muri Teritwari ya Walungu ikaba iri ku ntera ya kilometero 45 mu Majyepfo ya Bukavu na kilometero zigera kuri 70 mu Majyaruguru y'umujyi wa Uvira ku kiyaga cya Tanganyika.
Radio RFI ivuga ko ku wa kabiri habaye imirwano hagati ya M23 n'ingabo z'u Burundi zari zikambitse i Kamanyola mbere y'uko izo ngabo zihungira muri Uvira.
Ingabo za DRC zavuye i Bukavu n'izari ku mupaka wa Kamanyola bivugwa ko hashize iminsi zarahungiye mu mujyi wa Uvira mu Majyepfo.
Umupaka wa Kamanyola niwo wari usigaye kwigarurirwa na M23 mu mipaka yose ihuza Rupubulika Iharanira Demukarasi ya Congo n’u Rwanda.
Gufata Kamanyola kwa M23 bije nyuma y'iminsi mike ifashe Bukavu, ibituma benshi bavuga ko M23 irimo kumanuka isatira umujyi wa Uvira ukaba wa kabiri mu ntara ya Kivu y'Epfo.
Hagati aho, kuri uyu wa kabiri havuzwe imirwano muri Teritwari ya Lubero hagati ya M23 n'ingabo za Leta FARDC.
Muri iyi Teritwari, M23 igenzura agace ka Alimbongo kari muri 50km uvuye mu mujyi muto wa Lubero centre na hafi 100km uvuye mu mujyi wa Butembo.
