Myugariro w'ikipe ya Ajax Amsterdam witwa Lisandro Martinez ni imari ishyushye muri iyi mpeshyi, ndetse akomeje kubiza ibyuya amakipe akomeye yiganjemo ayo muri Premier league.
Ikipe ya Arsenal na Manchester United niyo makipe yamaze kugaragaza byeruye ikifuzo cyayo, akaba akomeje inkundura yo kureba uko yakwegukana uyu munya-Argentine w'imyaka 24.
Ikipe ya Ajax yo ivuga ko ikipe yaba ifite miliyoni 43 z'amapawundi yaza igasinyisha uyu musore, ariko Manchester United yo yababwiye ko ishaka kumutangaho miliyoni 39.6 z'amapawundi.
Manchester United na Arsenal ziri kurwanira Martinez(Net-photo)
Ku ikubitiro Manchester United ishaka gutanga miliyoni 35.3 z'amapawundi, ikazatanga n'izindi 4.3 bitewe n'uko azagenda yitwara ( ayo mu cyongereza bita add-ons).
Manchester United yakoze ibi mu gihe mu minsi ishize Arsenal nayo yari yabwiye Ajax ko yifuza gutanga miliyoni 34 z'amapawundi kuri Lisandro Martinez.
Umutoza mushya wa Manchester United Erik Ten Hag arashaka Lisandro yatozaga mu mwaka ushize, aho ashaka kubanza gusana ubwugarizi bwa Manchester United buva.
Uyu mugabo kandi arenda gusinyisha undi myugariro ukina ku ruhande rw'ibumoso ariwe Tyrell Malacia ukinira ikipe ya Feyenoord nayo yo mu Buhorandi.
