Inkomoko y'umunsi mpuzamahanga w'abagore

Inkomoko y'umunsi mpuzamahanga w'abagore

 Mar 8, 2024 - 07:08

Byinshi wamenya ku nkomoko y'umunsi mpuzamahanga w'abagore, kubera iki wizihizwa tariki ya 08 Werurwe?, watangiye ryari ?n'ibindi byinshi.

Umunsi mpuzamahanga w'abagore wizihizwa mu isi yose tariki ya 8 Werurwe buri mwaka. Uyu munsi ukaba umaze imyaka 112 wizihizwa.

Inkomoko y'umunsi mpuzamahanga w'abagore

Uyu munsi wakomotse ku bagore b'abakozi bo muri Leta zunze Ubumwe z'Amerika mu mwaka w'1908, aho basabaga kongererwa imishara kandi hakagabanywa n'amasaha bamara ku kazi.

Muri uyu mwaka, abagore bagera 15,000 bateraniye mu mugi wa New York basaba ibi byose twabonye haruguru.

Muri uyu mwaka kandi nibwo ishyaka ryo muri USA, The Socialist Party of America ryemeje umunsi w'abagore mu gihugu hose.

Ninde wazanye igitekerezo cy'uyu munsi mpuzamahanga?

Umugore w'Umudage Clara Zetkin wagenderaga ku mahame ya gikominisite agaharanira n'uburenganzira bw'abagore niwe wazanye igitekerezo cy'umunsi mpuzamahanga w'abagore mu mwaka w'1910.

Clara Zetkin wazanye igitekerezo cy'umunsi mpuzamahanga w'abagore 

Madamu Clara Zetkin akaba yaratanze iki gitekerezo mu nama yahuje abagore 100 b'abakozi baturutse mu bihugu 17, ikaza kubera Copenhagen muri Denmark.

Ibihugu byizihije uyu munsi bwa mbere

Mu mwaka 1911 ibihugu birimo:Austria, Denmark, Germany na Switzerland biri mu byabimburiye ibindi kwizihiza uyu munsi.

Mu mwaka 1975 umuryango w'abibumbye (UN) wemeje ko uyu ubaye umunsi mpuzamahanga.

Kuki uyu munsi wizihizwa tariki ya 8 Werurwe?

Madamu Clara Zetkin wazanye iki gitekerezo nta tariki yigeze avuga uyu munsi wazajya wizihirizwaho.

Iyi tariki yavuye ku bagore bo mu Burusiya bigaragambirije kubona imigati n'amahoro mu mwaka w'1917 ubwo igihugu cyari mu ntambara ya mbere y'Isi.

Bakoze iyi myigaragambyo tariki ya 23 Gashyantare, ku ngengabihe yitiriwe Julian (Julian calendar), kuri iyi tariki biba ari tariki ya 8 Werurwe ku ngengabihe yitiriwe Gregorian (Gregorian calendar), ari nayo Ibihugu byinshi bigenderaho mu Isi.

Bitewe nuko ibihugu byinshi mu isi bikoresha ingengabihe ya Gregorian calendar, bahisemo kuba aribwo uyu munsi wazajya wizihizwa.

Umunsi mpuzamahanga w'abagore ni itariki yo kureba aho abagore bageze bagira uruhare mu muryango mugari, muri politike, ubukungu n'ahandi hanyuranye dore ko imyaka myinshi yashize baratsikamiwe.