Amakuru ava i Maseyside mu Bwongereza aravuga ko Fenway Sports Group ifite Liverpool kuva mu 2010 yatangiye kwakira ubusabe bw'abashaka kugura ikipe ya Liverpool, imwe mu makipe akomeye muri iki gihugu.
Aba banyamerika baguze iyi kipe muri Kanama 2010 ubwo bari bayiguze n'abaherwe babiri bari bayifite aribo George Gillet na Tom Hicks nabo bakomoka muri Leta zunze ubumwe za America.
Muri Gicurasi 2022 ikinyamakuru Forbes kizwi mu nkuru z'ubukungu cyakoze igenagaciro kivuga ko Liverpool ifite agaciro ka miliyari 3.89, ariko byitezwe ko Fenway Sports Group izasaba amafaranga ari hejuru biturutse kuri Chelsea iherutse kugurwa miliyari 4.25 z'amapawundi.
Nubwo FSG imaranye Liverpool imyaka isaga 12, batangiye guhirwa muri iyi kipe nyuma yo guha akazi umutoza Jurgen Klopp mu 2015. Uyu mutoza yaraje atwara UEFA Champions League, igikombe cya shampiyona, Carabao Cup na FA Cup.
Fenway Sports Group iyobowe na John W Henry ni nayo ifite ikipe ya Baseball yitwa Boston Red Sox, televiziyo ya NESN na 50% bya Roush Fenway Racing.
Aba banyamerika bagiye kugurisha Liverpool mu gihe amakipe ane mu makipe atandatu akomeye mu Bwongereza, ubu yose abaherwe bayo ari abanyamerika. Aya makipe ni Liverpool, Manchester United, Chelsea na Arsenal.
Bigaragara ko kandi amakipe ikenda yo muri Premier League abaherwe bayo ari abanyamerika. Aho badafite ikipe ijana ku ijana, bagiye bafitemo imigabane.
John W Henry n'umugore we bateruye igikombe Liverpool yatwaye
