Nk'uko byari byatangajwe na Perezida wa Rayon Sports, Bwana Twagirayezu Thaddée mu kiganiro n'itangazamakuru cyo kuri uyu wa Kabiri tariki 08 Nyakanga 2025, Rayon Sports yaburaga abakinnyi batatu ngo ifunge isoko ryayo ry'igura n'igurisha ry'abakinnyi barimo myugariro, ukina mu kibuga hagati yugarira ndetse na rutahizamu.
Chadrack Bingi Belo wasinyishijwe ni mukinnyi ki?
Chadrack Bingi Belo afite imyaka 20 y'amavuko akaba akina nka rutahizamu, yakinaga muri shampiyona y'icyiciro cya mbere muri Congo mu ikipe ya DC Motema Pembe.
Iyi kipe ya Motema Pembe yabaye iya Kane muri shampiyona n'amanota 31 mu mikino ya kamarampaka (playoffs), cyane ko shampiyona y'iki gihugu ikinwa mu matsinda hagendewe ku duce aherereyemo ahanini kubera ubunini bw'iki gihugu.
Mu mwaka ushize w'imikino yatsinze ibitego 10 muri shampiyona y'icyiciro cya mbere muri Congo, mu gihe uwa mbere muri icyo gihugu yatsinze 13.
Mu mwaka wa 2023-2024 yatsinze ibitego 13, bisobanura ko mu myaka ibiri y'imikino ishize yatsinze ibitego 23.
Bingi Belo ukina nka rutahizamu wa Kabiri (second striker), mu mwaka wa 2024 ubwo yari afite imyaka 19 yagiye gukora igeragezwa mu ikipe ya Hearts of Oak yo muri Ghana gusa ntibyigeze bikunda.
Rayon sports si ubwa mbere igiye gutunga umukinnyi ukomoka mu gihugu cya Repubulika ya Demokarasi ya Congo, kuko hari n'abandi bagiye bayifasha mu bihe bitandukanye nka Kambale Salita Gentil, Héritier Luvumbu Nzinga, Jérôme Sina(2014–2016), Bokota Kamana Labama(2005-2008) ndetse n'abandi .
Chadrack Bingi Belo yasinye amasezerano y'imyaka ibiri muri Rayon Sports
Chadrack Bingi Belo ahasanze abandi bakinnyi batanu bamaze kugurwa
