Mu gihe umwaka w'imikino mu Rwanda uri kugana ku musozo, amakipe atandukanye yatangiye kubengukwa abakinnyi ashaka kongeramo, ndetse amwe yatangiye no kubasinyisha.
Ikipe ya Rayon Sports nayo iri muri ayo makipe yatangiye kwitegura umwaka utaha w'imikino hakiri kare, ari nako inyuza umweyo mu bakinnyi babanye nayo muri uyu mwaka ngo batange umwanya ku bashya baza kuyizahura.
Kugeza kuri ubu amazina y'abakinnyi batanu niyo yamaze kujya hanze ko yamaze gutandukana na Murera. Muri abo bakinnyi batanu uwa mbere ni Kwizera Pierrot wagarutse muri Rayon Sports mu gice cya kabiri cya shampiyona avuye muri AS Kigali.
Uyu murundi wari wavuye muri Rayon Sports akunzwe cyane kubera uburyo yitwaye, kuri iyi nshuro ntiyahiriwe. Pierrot yakinnye imikino 13, harimo imikino itatu y'igikombe cy'amahoro n'icumi ya shampiyona.
Pierrot ntiyahiriwe no kugaruka muri Rayon Sports(Net-photo)
Uyu mugabo kandi wari umenyerewe ku mashoti ya kure yajyaga avamo ibitego, kuri ubu avuye muri Rayon Sports nta gitego ayitsindiye.
Undi mukinnyi ugomba gutandukana na Rayon Sports ni umunya-Cameroon Mael Dindjeke nawe utarahiriwe n'intangiro z'umwaka w'imikino muri iyi kipe. Dindjeke yakiniye Gikundiro imikino 13 irimo itatu y'igikombe cy'amahoro, ayitsindira igitego kimwe gusa.
Dindjeke yafashije asize atsinze igitego kimwe
Rutahizamu Sulleiman Sanogo kandi nawe ntabwo umweyo wa Rayon Sports wamusize mu ikipe. Uyu musore nawe yageze muri Rayon Sports mu ntangiro z'uyu mwaka w'imikino asinya amasezerano y'imyaka ibiri, gusa ntacyo yayimariye kuko nta n'igitego yatsinze mu mikino itandatu ya shampiyona yayikiniye.
Sanogo agiye ntq gitego atsinze mu marushanwa(Image:Rwanda Magazine)
Undi rutahizamu nawe ugomba gusohoka muri iyi kipe ni umunya-Cameroon Steve Elomanga. Uyu musore nawe yinjiye muri Rayon Sports mu ntangiro z'umwaka w'imikino, asize akiniye Rayon Sports imikino ine ya shampiyona atsindamo igitego kimwe.
Elomanga nawe agiye atsindiye Rayon igitego kimwe(Image:Rwanda Magazine)
Umukinnyi wa gatanu wamaze kumenyekana ko atazaguma muri Rayon Sports ni umukongomani Manace Mutatu Mbedi wageze muri iyi kipe mu 2020 ubwo yavaga mu ikipe ya Gasogi United.
Uyu musore waje yitezweho byinshi muri iyi kipe, ntabwo yagaragaye cyane mu kibuga muri uyu mwaka w'imikino kubera ibibazo by'imyitwarire. Uyu nawe ari ku rutonde rw'aba bakinnyi batanu bakwiye kuba bashaka aho bazakina mu mwaka utaha.
Mutatu nawe arava muri Rayon Sports(Net-photo)
Aba ni abakinnyi bamaze kumenyekana ko igihe cyabo muri Rayon Sports cyarangiye, ariko bivugwa ko atari aba gusa bazatandukana nayo kuko n'abandi bazagenda bamenyekana mu minsi iri imbere.
