Mu kiganiro yagiranye na 'The Shade Room', Akon yavuze ko Drake wari ukiri kuzamuka mu muziki yasabaga miliyoni imwe y'amadolari ya Amerika kugira ngo amusinyishe, kandi ntiyari yakabaye icyamamare mu muziki wa Amerika.
Nubwo benshi bari bazi ko Akon ariwe wazamuye Wizkid, yashimangiye ko atari we ahubwo ko yamufashije kugera ku isoko ry'umuziki wo muri Leta Zunze Ubumwe za Amerika nyuma yo kumusinyisha.
Yagize ati: "Banky W yazanye Wizkid ndamubona, mpita mvuga nti 'Uyu mwana azavamo inyenyeri.' Icyo gihe bari bafite ubushobozi buke, bityo igihe namusinyishaga nibwo yatangiye kumenyekana muri Leta Zunze Ubumwe za Amerika."
Nyuma yo gusinya muri Empire Mates Entertainment ya Banky W, Wizkid yakomeje kugaragaza ko ari impano ikomeye, ibyatumye umuherwe Akon ahitamo kumusinyisha, aho guhitamo Drake wasabaga iby'umurengera.
Wizkid ni umwe mu bahanzi nyafurika bibyamamare dore ko yagiye yamamara mu ndirimbo zitandukanye nka Essence, Ojuelegba, Fever n'izindi.
Umwanditsi: NIYOMUKIZA Gratien
