CAF itegura ikanagenzura irushanwa rya AFCON(Igikombe cya Afurika) yamaze kugira icyo ivuga ku isanganya ryabaye muri Cameroon ryasize abantu batandatu bitabye Imana.
Abantu kandi basaga 40 bakomeretse bikomeye mu mivundo yabaye hanze ya Stade Olembe mbere y'uko umukino wa Cameroon na Comoros utangira bashaka itike ya kimwe cya kane.
Ubusanzwe stade Olembe yakira abantu ibihumbi 60 ariko kubera Covid-19 amabwiriza avuga ko batagomba kurenza 80% y'imyanya ya stade, ariko bivugwa ko hari abantu basaga ibihumbi 50 barimo bagerageza kwinjira ngo barebe uyu mukino.
Hari amashusho yagiye hanze agaragaza uko ibintu byari byifashe ndetse bamwe mu bari aho bavuga ko hari umubare munini w'abana muri abo bantu bakomeretse.
Mu itangazo CAF yasohoye yagize iti:"CAF yamenye isanganya ryabaye kuri stade Olembe ku mukino w'igikombe cya Afurika wahuzaga Cameroon na Comoros muri iri joro tariki 24 Mutarama 2022.
"CAF iri kugenzura neza ikibazo ndetse iri gushaka amakuru yose ngo hamenyekane icyabiteye. Turi kuvugana cyane na leta ya Cameroon ndetse n'indi miryango mu gihugu.
"Muri iri joro Perezida wa CAF Patrice Motsepe, yohereje General secretary Veron Mosengo-Omba gusura abagize ibibazo mu bitaro i Yaounde."
Umukino wa Cameroon na Comoros aba bantu bashakaga kureba warangiye Cameroon itsinze Comoros ibitego 2-1, bituma iyi kipe ihita ikomeza mu mikino ya kimwe cya kane.
Imivundo yabaye kuri stade Olembe(Net-photo)
Cameroon yatsinze Comoros kuri stade Olembe(Net-photo)
