Ikipe ya Braga yo muri Portugal ni ikipe ya 152 igiye gukina na Real Madrid, byumvikane ko ari ubwa mbere iyi kipe yo muri Espagne iraba ikiniye kuri iyi stade yitwa Municipal Stadium.
Iyi stade yakira abantu ibihumbi 30 bicaye, yubatse mu buryo hagegenwe uruhande rw'umusozi ku buryo ku mpande uba ubona igisa n'urukuta rurerure rw'amabuye yakaswe.
Iyi stade ifite agatazirano k'ikirombe yubatswe mu 2003, ikaba yaruzuye itwaye miliyoni 175 z'amapawundi.
Uburyo iyi stade yubatse mu buryo butangaje byatumye ihabwa igihembo cya Pritzker Prize mu 2011 kizwi nk'igihembo kitiriwe Nobel ariko gihabwa abashushanyi b'inyubako(architecture).
Stade y'ikipe ya Braga yatangaje benshi kuba yubakwa
Eduardo Souto de Moura wari uyoboye umushinga wo kubaka iyi stade mu 2002, yagize ati:"Stade ya Braga ishobora kuba ariwo mushinga ugoye cyane nigeze nkora mu buzima bwange. Ku bw'iyo mpamvu ushobora kuba ari nawo wandyoheye.
"Bari bafite ikibanza cyo kubakamo stade mu kibaya, hacamo amazi. Narahasuye ndahakunda cyane."
Braga ikinira imikino yo mu rugo kuri iyi stade kuva mu 2003 ikaba iyikodesha n'ubuyobozi bw'umujyi amapawundi 435 ku mwaka, gusa ibiganiro byaratangiye ngo iyigure burundu inavugururwe ishyirwe ku rwego rwisumbuye.
Abo muri iyi kipe batekereza ko ishobora gukoreshwa mu gikombe cy'isi cya 2030 dore ko hari imikino izakinirwa muri Portugal, ariko byasaba ko ivugururwa byibuze n'abantu yakira bakazamuka bakagera ku bihumbi 60.
Iyi stade yahawe igihembo kubera umwihariko mu myubakire
