Kuva mu mwaka w'imikino 2019-2020 ntabwo Tottenham irasubira muri UEFA Champions league, gusa kugeza ubu ikomeje kurwana inkundura ngo irebe ko yasoza shampiyona iri mu makipe ane ya mbere.
Amafaranga abakinnyi ba Tottenham basobora guhabwa agiye agabanyije mu byiciro. Hari miliyoni y'amapawundi bahabwa igihe basoza shampiyona ku mwanya wa kane, cyangwa bagahabwa miliyoni n'igice y'amapawundi basoje ku mwanya wa gatatu.
Gusa hari n'utundi duhimbazamusyi abakinnyi bazahabwa bijyanye n'uko bagiye bitwara mu mikino itandukanye muri uyu mwaka w'imikino. Daily mail ivuga ko muri rusange abakinnyi ba Tottenham bazahabwa asaga miliyoni eshatu z'amapawundi igihe yaza mu makipe ane ya mbere mu Bwongereza.
Ayo mafaranga yose biteganyijwe ko azagabanwa n'abakinnyi ndetse n'abatoza(Squad) ba Tottenham Hotspurs. Usibye ibyo kandi bivugwa ko hari n'abakinnyi ku giti cyabo bagiye bashyira mu masezerano yabo uduhimbazamusyi tujyanye no kujya muri UEFA Champions league.
Ni n'uko bimeze kandi ku mutoza Antonio Conte kuko ngo hari agahimbazamusyi agomba kubona mu gihe yaba ajyanye iyi kipe muri Champions league, bivugwa ko yahabwa miliyoni ebyiri z'amapawundi nk'uko byari bimeze kuri Jose Mourinho wayitozaga mbere.
Abakinnyi ba Tottenham bazahabwa akayabo nibajya muri Champions league(Image:Getty)
Ni mu gihe kandi muri Werurwe hasohotse amakuru avuga ko abakinnyi ba Arsenal nabo bemerewe ibihumbi 500 by'amapawundi kuri buri umwe mu gihe babona itike yo gukina UEFA Champions league bamaze imyaka myinshi batagaragaramo. Byumvikane ko aba Arsenal bashyiriweho menshi kurenza aba Tottenham.
Kugeza ubu imyanya ihataniwe igaragara ko ari ibiri, ariko uwo Tottenham yakurikira cyane ni uwa kane kuko uwa gatatu wo hari ukuntu bisa n'ibigoye ko yawubona. Mu gihe Chelsea, Arsenal na Tottenham zisigaje imikino ine ngo shampiyona irangire, Chelsea iri ku mwanya wa gatatu n'amanota 66, Arsenal ku wa kane n'amanota 63, naho Tottenham ifite amanota 61 ku mwanya wa gatanu.
Kuva mu mwaka w'imikino wa 2016-2017 ikipe ya Arsenal ntirabasha kongera gusubira muri Champions league, ariko uyu mwaka bigaragara kp ifite amahirwe yo kujyayo. Gusa ibyo igomba kubihatanira na Tottenham iri kuyihumekera mu bitugu, cyangwa ikareba uko yafata umwanya wa gatatu.
