Iminsi yari ibaye myinshi abanyarwanda bakunda umupira w'amaguru muri rusange bafite impungenge z'ukuntu ikipe y'igihugu Amavubi igiye kwitegura imikino yo gushaka itike y'Igikombe cy'isi idafite umutoza.
Gusa nk'uko byari bimaze iminsi bivugwa, ku gicamunsi cyo kuri uyu wa Gatatu FERWAFA yemeje ko umudage Torsten Frank Spittler ariwe wagizwe umutoza mukuru w'ikipe, akaba yahawe amasezerano y'umwaka umwe ushobora kongerwa.
Uyu mugabo w'imyaka 61 kandi azungirizwa na Jimmy Mulisa ndetse na Yves Rwasamanzi usanzwe atoza Marine FC.
Muri Kanama 2023 nibwo Carlos Alôs Ferrer wari umutoza mukuru w'ikipe y'igihugu Amavubi yasezeye kuri iyi mirimo, aho akazi ke kabaye gahawe Gerard Buscher usanzwe ari umuyobozi wa tekiniki muri FERWAFA.
Torsten Frank wamaze guhabwa Amavubi imyaka 30 k'ubutoza, akaba yarabaye umutoza wungirije w'ikipe y'igihugu y'u Budage y'abatarengeje imyaka 16.
Uyu mugabo kandi yatoje ikipe y'igihugu y Nepal n'iya Bhutan, ndetse aba umuyobozi wa tekiniki muri Sierra Leone, Mozambique na Yemen.
Ikipe y'igihugu Amavubi igiye kwitegura imikino yo gushakisha itike y'igikombe cy'isi cya 2026 aho iri mu itsinda C hamwe na Nigeria, South Africa, Lesotho, Zimbabwe na Benin.
Umukino wa mbere uteganyijwe tariki 15 Ugushyingo 2023.
Torsten Frank yemejwe nk'umutoza w'Amavubi
