Uyu mupolisi yarashe umugore we amwicira mu rugo rwabo. Yahavuye atwaye imbunda y’akazi yo mu bwoko bwa AK-47 agiye kuyirashisha abandi bantu batanu, nk’uko ishami rishinzwe iperereza muri Kenya ryabitangaje ku rubuga rwa Twitter. Ryavuze ko uwo mupolisi yari yariye karungu atakigendera ku mabwiriza y’akazi asanzwe amugenga.
Francis Wahome, ukuriye ubuyobozi bwa polisi mu karere ka Dagoretti ko muri Nairobi, yatangaje ko abandi bantu babiri babikomerekeyemo.
Yanze kugira icyo avuga ku cyateye uwo mupolisi iyo myitwarire. Gusa yavuze ko iperereza rikomeje mu ibanga kandi ririmo ibintu byinshi adashobora gutangariza abanyamakuru.
Umuturage w’akarere ka Dagoretti witwa Lameck Alaka yavuze ko mbere y’uko uwo mupolisi amisha urusasu ku bantu, imodoka akeka ko ari iya polisi yabanyuzeho, ihagarara imonota 20, nyuma uwitwa Ben arasohoka, afite imbunda ya AK-47 ahita ayisharija abamishaho urusasu.
Ubuyobozi bwa polisi buvuga ko kugeza ubu uyu mupolisi yari asanzwe akora akazi neza kandi ko imyitwarire nk’iyi itari yarigeze imugaragaraho.
Umunyamakuru w’ibiro ntaramakuru by’Abongereza (Reuters) yavuze ko abaturage b’aho byabereye batwitse amapine ashaje mu gikorwa cyo kugaragaza uburakari bw’ibyabaye.
