Umukinnyi ukina hanze y'u Rwanda yemeye gukinira Amavubi

Umukinnyi ukina hanze y'u Rwanda yemeye gukinira Amavubi

 Apr 26, 2022 - 02:26

Umusore w'imyaka 22 witwa Gilbert Ishimwe ukina hagati mu kibuga yugarira yemeye kuba yakinira Amavubi, nyuma y'ibiganiro yagiranye n'umutoza mushya w'ikipe y'igihugu Amavubi.

Mu byo umutoza mushya w'ikipe y'igihugu Carlos Alós Ferrer yavuze nyuma yo gutangazwa yavuze ko yifuza ikipe y'igihugu yaba irimo amasura mashya, yibanda ku bakinnyi b'abanyarwanda baba baravukiye mu mahanga.

Kuri ubu amakuru ahari aravuga ko uyu mugabo yaganirije umusore w'imyaka 22 witwa Gilbert Ishimwe ndetse akaba yaramaze kwemera kuza gukinira Amavubi.

Gilbert Ishimwe yavutse tariki 10 Ukwakira, akaba akina mu kibuga hagati yugarira(Defensive midfielder) mu ikipe ya Örebro Syrianska IF yo mu kiciro cya gatatu muri Sweden.

Gilbert Ishimwe yemeye gukinira Amavubi(Image:ekuriren.se)

Amakuru y'uyu musore yatanzwe na Rafael York nawe wemeye gukinira Amavubi, aba bombi bakaba baranakinanye mu ikipe ya Eskilstuna mbere y'uko Gilbert Ishimwe yerekeza muri iyi kipe arimo ya Örebro Syrianska.

Mu Ukuboza 2021 nibwo Ishimwe Gilbert yerekeje muri iyi kipe ya Örebro ubwo yavaga muri IFK Eskilstuna ku buntu. Yasinye amasezerano y'umwaka umwe ashobora kongerwa. 

Uyu musore kandi yavukiye muri Sweden ku babyeyi b'abanyarwanda bivuze ko ari umunya-Sweden w'umunyarwanda, akaba yaratangiyiriye umupira w'amaguru ku buryo bweruye mu ikipe ya IFK Eskilstuna.