Ku wa mbere mu gitondo, Tyrese Gibson yagejejwe mu rukiko azira kutishyura indezo y’umwana yabyaranye n’uwahoze ari umugore we, Samantha Lee.
Nk’uko TMZ ibitangaza, umukinnyi wa filime wamamaye muri “Fast & Furious” we na Samantha bafitanye umwana w’umukobwa w’imyaka 5 witwa Soraya, rero bitabye umucamanza Kevin Farmer mu Ntara ya Fulton, muri Georgia, kubera ikibazo cyo kurera umwana.
Tyrese Gibson yamaze kugezwa mu nkiko n'uwahoze ari umugore we
Biravugwa ko umucamanza yibukije Tyrese ko yanze kwishyura ibihumbi 15 by’amadorari yagombaga kujya yishyura buri kwezi nk’uko yari yabitegetswe n’urukiko guhera muri Mata umwaka ushize, bityo Tyrese arashinjwa gusuzugura urukiko no kwirengagiza inshingano za kibyeyi.
Nk’uko amakuru abitangaza, umucamanza Farmer yavuze ko Gibson ashobora kwirinda gereza aramutse yishyuye ibihumbi 150 by’amadorari, harimo ibihumbi 17 by’amadorari nk’igihembo cya avoka wa Samantha Lee.
Icyakora amakuru avuga ko Tyrese Gibson afite gahunda yo kwishyura ayo mafaranga.
Tyrese yabwiye abakunzi be mu mpera z’icyumweru gishize ko ashobora gutabwa muri yombi avuga ko umucamanza Farmer hamwe n’itsinda ry’abashyigikiye uwahoze ari umugore we barimo kumugenda runono.
