N'ubwo amaso y'abakunzi ba ruhago benshi ahugiye i Doha muri Qatar kubera imikino ya nyuma y'igikombe cy'isi, shampiyona y'ikiciro cya mbere mu Rwanda ntabwo yahagaze.
Kuri iki Cyumweru habaye imikino y'umunsi wa 11 wa shampiyona y'u Rwanda aho byarangiye amakipe menshi yari yitezweho kubona amanota atatu, byarangiye agayitse.
Umukino wa mbere wabereye kuri sitade ya Kigali i Nyamirambo, ikipe ya Kiyovu Sports yashakaga intsinzi ngo yotse igitutu Rayon Sports ku mwanya wa mbere, byarangiye itsinzwe na Gasogi United igayitse cyane.
Gasogi United yabonye igitego cya mbere ku munota wa 14 gitsinzwe na Malipangu Christian, ku munota wa 76 atsinda igitego cya kabiri kuri penariti.
Ku munota wa 83 Nkizingabo Fiston yatsindiye Kiyovu Sports igitego kimwe, ariko mu gihe Kiyovu yashakaga kugaruka ngo yishyure nibwo Mackenzie yatsindiye Gasogi igitego cya gatatu mu munota y'inyongera.
Ikipe ya Rayon Sports yo yari yerekeje i Musanze gushaka amanota atatu ngo ikomeze kuyobora urutonde rwa shampiyona ariko ntiyorohewe. Byatangiye Rayon Sports ibona ikarita itukura ku munota wa 45, ku ikarita ya kabiri y'umuhondo yeretswe myugariro Samuel ahita asohoka mu kibuga.
Ikipe ya Musanze FC yatsinze ibitego bibiri byaje mu minota ya nyuma icya mbere gitsindwa na Peter Agblevor ku munota wa 84, mu gihe Namanda Wagula yatsinze icya kabiri ku munota wa 86. Umukino warangiye Rayon Sports itsinzwe ibitego 2-0.
APR FC yo yari yerekeje mu majyepfo aho yari yasuye ikipe ya Mukura Victory Sports mu mukino wabereye kuri sitade mpuzamahanga ya Huye, ariko uyu mukino warangiye nta kipe ibashije kureba mu izamu ry'iyindi.
Undi mukino wabaye warangiye ikipe ya Rwamagana City itsinze Espoir FC igitego kimwe cyatsinzwe na Mbanza Joshua ku munota wa 74 kiyihesha amanota atatu.
Kiyovu Sports yatsinzwe na Gasogi United
Uko urutonde rwa shampiyona ruhagaze
