Umutoza Mauricio Pochettino utoza ikipe ya Chelsea yumvikanye avuga ko umuherwe w'iyi kipe Toddy Boehly yari kumwica iyo adakinisha abakinnyi bakomeye iyi kipe yasinyishije.
Uyu mugabo ukomoka muri Argentine afite urutonde rurerure aba agomba gutoranyamo abakinnyi abanza mu kibuga, gusa harimo bake bisa n'aho biba bigoranye ko yabasiga ku ntebe y'abasimbura.
Aganira n'itangazamakuru nyuma yo kunganya na Arsenal ibitego 2-2, Pochettino yavuze ko yagombaga gukinisha Enzo Fernandez na Moises Caicedo kubera igitutu cya Toddy Boehly n'itangazamakuru.
Yagize ati:"Ni ubusazi kuba abakinnyi bava muri America y'epfo ku wa Gatatu, bagahita bakina ku wa Gatandatu. Enzo na Caicedo bari bananiwe.
"Ariko iyo mvuga nti reka reka mbahe ikiruhuko ntibakine...mwari kunyica, nukuri. Na nyir'ikipe kandi ni uko."
Aba bakinnyi bombi bakina hagati mu kibuga mu ikipe ya Chelsea bari barerekeje mu makipe yabo y'ibihugu, aho bose bagaragaye mu mikino ibiri amakipe yabo yakinnye.
Caicedo yakinnye imikino yombi iminota 90 aho Ecuador yakinnye Colombia ndetse na Bolivia, mu gihe Enzo nawe yakinnye imikino ibiri Argentine yatsinzemo Paraguay na Peru.
Gusa iyi mikino ntikuraho ko Toddy Boehly yifuzaga kubona aba basore bombi yatanzeho miliyoni 222 z'amapawundi, bashakira ikipe ya Chelsea intsinzi imbere ya Arsenal n'ubwo bari bananiwe.
Iyi ishobora kuba imwe mu mpamvu zatumye ikipe ya Chelsea itakaza amanota abiri muri uyu mukino, nyamara abafana bayo bari bafite ikizere cyo gutahana amanota atatu kubera kubona ibitego hakiri kare.
Chelsea yari imbere ya Arsenal ho ibitego bibiri mu gice cya kabiri, mbere y'uko Declan Rice na Leandro Trossard batsindira Arsenal ibitego byo kwishyura bikarangira ari 2-2.
Igitutu cya Toddy Boehly cyatumye Pochettino akinisha abakinnyi bananiwe
