Juvénal Marizamunda ubu ni we Minisitiri w'ingabo z'u Rwanda mushya, mu gihe Liyetona Jenerali Mubarakh Muganga ari umugaba mukuru w'ingabo z'u Rwanda (RDF), nkuko biri mu mpinduka Perezida Paul Kagame yakoze no mu rwego rw'ubutasi.
Marizamunda, asimbuye kuri uwo mwanya Jenerali Majoro Albert Murasira, wari asanzwe ari umukuru w'urwego rw'igihugu rw'igorora, rushinzwe imfungwa n'amagereza (RCS).
Lt Gen Mubarakh Muganga Umugaba mukuru w'ingabo z'u Rwanda
Lt Gen Muganga, usimbuye Jenerali Jean Bosco Kazura, we yari asanzwe ari umugaba mukuru w'ingabo zirwanira ku butaka.
Gen Jean Bosco Kazura wasimbuwe na Lt Gen Mubarakh Muganga
Jenerali Majoro Vincent Nyakarundi wari usanzwe ari umukuru w'ubutasi bwa gisirikare, ni we wasimbuye Lt Gen Muganga ku mwanya w'umugaba mukuru w'ingabo zirwanira ku butaka.
Naho kandi, Col Francis Regis Gatarayiha yagizwe umukuru w'agateganyo w'ubutasi bwa gisirikare, mu gihe Jean Bosco Ntibitura yabaye umuyobozi mukuru (Director General) ushinzwe umutekano mu gihugu mu rwego rw'ubutasi bw'imbere mu gihugu (NISS).
Juvénal Marizamunda ubu ni we Minisitiri w'ingabo z'u Rwanda
Brigadiye Jenerali Evariste Murenzi yagizwe umukuru w'urwego rw'igihugu rw'igorora, asimbura Marizamunda.
Jenerali Majoro Alex Kagame yabaye umukuru w'ibikorwa bya gisirikare muri Mozambique, mu gihe Koloneli Théodomir Bahizi ari we ukuriye ibijyanye n'urugamba rwo muri Mozambique.
Jenerali Majoro Alex Kagame
Umugaba mukuru w'ingabo z'u Rwanda yaherukaga guhindurwa mu kwezi kw'Ugushyingo mu 2019, ubwo Jenerali Kazura, icyo gihe wari Jenerali Majoro, yazamurwaga mu ntera mu mapeti agasimbura Jenerali Patrick Nyamvumba, wari uri kuri uwo mwanya kuva mu 2013.
Jenerali Majoro Murasira we yari Minisitiri w'ingabo kuva mu kwezi kw'Ukwakira (10) mu 2018, umwanya yagezeho asimbuye Jenerali James Kabarebe wari uwumazeho imyaka umunani.
Jenerali Majoro Vincent Nyakarundi Umugaba mukuru w'ingabo zirwanira ku butaka.
View this post on Instagram
