Amafoto ye yakwirakwiye cyane ku mbuga nkoranyambaga, benshi bamushimira uburyo yahuje kwizihiza Eid al-Adha no kugaragaza urukundo afitiye Arsenal, nyuma yo gutwara igikombe cya shampiyona y’u Bwongereza.
Zohran Mamdani yavukiye kandi akurira muri Uganda, akaba ari we Meya wa mbere wa New York w’Umuyisilamu. Nubwo afite inshingano zikomeye zo kuyobora umwe mu mijyi ikomeye ku Isi, ntahisha ko umupira w’amaguru ari kimwe mu bintu akunda cyane.
Mamdani yavuze ko yatangiye gukunda Arsenal afite imyaka 10 y'amavuko, nyuma y’uko se wabo amuhaye udukinisho twari turiho amashusho y’abakinnyi bakomeye b’iyi kipe barimo Thierry Henry, David Seaman, Sol Campbell na Sylvain Wiltord, bikamutera kwihebera iyi kipe yo mu Bwongereza.
Kuva icyo gihe, urukundo rwe kuri Arsenal rwakomeje gukura kugeza n’aho yishimiye byimazeyo igikombe cya shampiyona iyi kipe iheruka kwegukana, nk’uko abafana bo mu duce dutandukanye tw’Isi babyishimiye.
Gusa gukunda umupira kwa Mamdani ntibigarukira kuri Arsenal gusa, kuko azwi kandi nk’umwe mu bantu bafite ubumenyi buhambaye ku mateka y’umupira w’amaguru, cyane cyane uwo mu myaka yo hambere.
Uyu munyapolitiki kandi ni umwe mu bafite imigabane mu ikipe ya Real Oviedo yo muri Espagne. Yabaye umwe mu bantu ibihumbi 20 baguze imigabane muri iyi kipe muri 2012 ubwo yari iri hafi guhomba.
Mamdani kandi aherutse kuvuga ku bibazo bijyanye n’ibiciro by’amatike y’Igikombe cy’Isi cya 2026, anenga uburyo FIFA iri gukoresha uburyo bwo guhindagura ibiciro nk’abandi bakunzi ba ruhago bose.
By’umwihariko, abafana ba Arsenal bakomeje kwibaza uko Mamdani azabyitwaramo mu gihe iyi kipe yaba itwaye igikombe cya UEFA Champions League, dore ko Arsenal igomba guhura na Paris Saint-Germain ku mukino wa nyuma uzabera i Budapest kuri uyu wa Gatandatu.
Umwanditsi: NIYOMUKIZA Gratien
