Tuyishime Joshua wamamaye nka Jay Polly ku ya 24 Gicurasi 2021 yataramiye abagororwa bafungiye muri iyo gereza mu gitaramo kiba kigamije gususurutsa abagore bahafungiwe.
Hari amashusho amara igihe gito yacaracaye ku mbugankoranyambaga ya Jay Polly ari kuririmbira abo bagororwa bizihiwe. Jay Polly yajyanywe i Mageragere nyuma yo gukatirwa gufungwa iminsi 30 y’agateganyo n’Urukiko Rwisumbuye rwa Gasabo kubera icyaha cyo gukoresha ibiyobyabwenge byo mu bwoko bw’urumogi akurikiranyweho. Afunganywe n’abantu bane bafatanywe mu rugo iwe banarenze ku mabwiriza yo kwirinda icyorezo cya Covid-19.
Kunywa ibiyobyabwenge ni icyaha gihanwa n’ingingo ya 11 y’itegeko Nº69/2019 ryo ku wa 08/11/2019 rihindura itegeko Nº 68/2018 ryo ku wa 30/08/2018 riteganya ibyaha n’ibihano muri rusange.
Jay Polly ufite abafana benshi mu njyana ya Rap,yasohotse gereza ya Mageragere iherereye mu karere ka Nyarugenge mu mujyi wa Kigali, ku wa 01 Mutarama 2019, saa tatu n’igice, yitwaje inkoni aherekejwe n’umucungagereza.
Kuwa 24 Kanama 2018 nibwo Urukiko rw’Ibanze rwa Gasabo rwahamije Jay Polly icyaha cyo gukubita no gukomeretsa umugore we akamukura amenyo mu ijoro ryo kuwa 04 Kanama 2018.
Jay Polly n’umugore we barwanye mu rukerera rwo ku wa 4 Kanama 2018 bitewe n’amakimbirane yatewe ahanini n’agasembuye,bivamo imirwano ikaze yatumye uyu mugabo akura amenyo umugore.
