Iki kiganiro cyarimo perezida wa Rayon Sports association, Twagirayezu Thaddée, Umuyobozi w’Urwego rw’Ikirenga rwa Rayon Sports, Paul Muvunyi ndetse n'abandi mu nzego zitandukanye z'ikipe.
Ibintu by’ingenzi byavugiwe muri iki kiganiro ukwiriye kumenya:
Ikipe ya Rayon Sports yagaragaje gahunda yagenewe abafana mu gufasha ikipe mu kugura abakinnyi no gukemura ibindi bibazo bihari, bityo hashyizweho intego yo gukusanya miliyoni 100 Rwf muri gahunda yiswe "Ubururu bwacu agaciro kacu".
Perezida wa Rayon Sports yagaragaje ko iyi kipe imaze gusinyisha abakinnyi batanu. Tugendeye ku byatangajwe n'iyi kipe ku mbuga nkoranyambaga zayo aba bakinnyi barimo Rushema Chris, Prince Michael Musore, Drissa Kouyate, Mohamed Chelly, ndetse na Tambwe Gloire.
Rayon sports kuri ubu ifite abafatanyabikorwa babiri b'ingenzi, Canal n'uruganda rwa SKOL mu gihe choplife yamaze gusoza amasezerano yari ifitanye n'iyi kipe.
SKOL igomba gusinyana amasezerano na Rayon Sports kuko uyu mwaka ushize w'imikino yari yararangiye. Muri uku kwezi kwa Nyakanga 2025 harasinywa andi bizajya bituma Rayon Sports yakira amafaranga ya buri kwezi azajya ava muri uru ruganda.
Ikipe isigaje kugura abakinnyi batatu nk'uko byagarutsweho na Perezida, myugariro, umukinnyi ukina mu kibuga hagati yugarira ndetse na rutahizamu, bikaba biteganyijwe ko bosa bazatwara Rayon Sports hagati ya Miliyoni 75 na 80, abafana bakazagira uruhare rwa 40% komite y'ikipe igire 60%.
Hafashwe ingamba zo kugabanya umubare w'abakinnyi (Rayon Sports yari ifite abakinnyi 35 bakaba bazagabanuka bakagera kuri 26) mu rwego rwo guhangana n'ibirarane by'imishahara y'abakinnyi aho bizatuma ku mafaranga Rayon Sports yahembaga hagabanukaho hafi miliyoni 10.
Ikipe ya Rayon Sports irategura gutunga abanyamahanga 13 n'Abanyarwanda 13, kuko bazitabira imikino ya CAF Confederations Cup ahemerwa umubare w'abanyamahanga wifuza gusa barateganya no kuzasaba ko umubare w'abanyamahanga muri shampiyona wazamurwa.
Ubuyobozi bwemeje ko nta makimbirane ari hagati yabo nk'uko bari babibajijweho ndetse byari bimaze igihe bivugwa mu itangazamakuru, bemeza ko umuntu utari kugaragara cyane ari uwahoze ari perezida wa Rayon Sports ucyuye igihe Uwayezu Jean Fidele nawe wabitewe n'uburwayi, gusa bemeza ko nta zibana zidakomanya amahembe.
'Rayon day' iteganyijwe mu kwezi kwa Kanama 2025 gusa hirinzwe gutangazwa itariki. Ikipe izakina na Rayon Sports ni Young Africans yo muri Tanzania, ibirori bikazabera muri sitade Amahoro nta gihindutse nk'uko ubuyobozi bwabyemeje ko byizewe ku rwego rwa 99%.
Umutoza wazanwe na Afhamia Lotfi ngo azamwungize, Lotfi Azouz ntabwo afite amasezerano ya Rayon Sports ndetse iyi kipe iri gushaka undi mutoza ugomba kuzungiriza.
Umutoza mukuru yari afite uburenganzira bwo kuzana umutoza wungirije ariko uwo yazanye ntabwo afite ibyangobwa byuzuye, afite License B aho CAF isaba abatoza bungirije bafite license A.
Kuri Hussein 'Bubuni' Afhamia Lotfi yavuze ko akwiye akazi kubera igihe yakoreye Rayon Sports idahembwa, perezida Thaddée nta guca ku ruhande yavuze ko atamuzi ndetse ko ataranavugana nawe bityo ko ataba umukozi wa Rayon Sports atamuzi yongeraho ko badateganya no kumuha akazi muri Rayon Sports ndetse ko nta n'ako yasabye.
Perezida wa Rayon sports yahishuye ko mu mujyo wo kugabanya umubare w'abakinnyi abarimo Prinsse Junior Elenga-Kanga, ndetse na Assana Nah Innocent Umunya-Cemeroon bazasohoka (gusa yavuze bamwe mu bo bifuza kurekura).
Ikiganiro n'itangazamakuru kitabiriwe n'ingeri zitandukanye muri Rayon Sports
Perezida wa Rayon Sports yasubije byinshi mu bibazo abakunzi b'iyi kipe bibazaga
Umuyobozi w'Urwego rw'Ikirenga rwa Rayon Sports Paul Muvunyi nawe yitabiriye
Abanyamakuru mu bitangazamakuru bitandukanye by'imbere mu gihugu nibo bitabiriye iki kiganiro
