Chelsea yatangiye gukorwaho iperereza na Premier League ku igurwa rya Samuel Eto'o na Willian baguzwe mu ikipe ya Anzhi Makhachkala yo mu Burusiya mu 2013, ubwo iyi kipe yo mu Bwongereza yari igifitwe na Roman Abramovich.
Amakuru atangazwa n'ikinyamakuru The Times avuga ko amafaranga ashobora kuba yarishyuwe kompanyi yo mu Burusiya zitagize aho zihuriye n'impande zarebwaga n'igurishwa ry'aba bakinnyi, ndetse n'amafaranga yishyuwe imiryango y'aba bakinnyi nayo ari gukorwaho iperereza.
Amafaranga yagiye yishyurwa yagaragaye muri Gicurasi 2022 ubwo umunyamerika Toddy Boehly yari muri gahunda zo kugura Chelsea, ndetse iyi kipe yagize icyo ibwira FA, Premier League na UEFA kuri iyi ngingo.
Chelsea yavuze ko ibi byabaye byakozwe n'abari bafite iyi kipe mu myaka yashize, bikaba ntaho bihuriye n'abayifite ubu aribo bayobowe na Toddy Boehly wayiguze asimbuye Roman Abramovic.
Mu gihe Chelsea yahamwa n'ibi byaha byo kwica amabwiriza ya Premier League yagenerwa ibihano, bishobora kubamo gucibwa amande no kuba yakurwaho amanota mu gihe bibaye ngombwa.
Eto'o na Willian baguzwe bava muri Anzhi Makhachkala
