Chelsea ikomeje guca amarenga yo gutwara igikombe

Chelsea ikomeje guca amarenga yo gutwara igikombe

 Nov 20, 2021 - 12:26

Ikipe ya Chelsea ikomeje kuyobora urutonde rwa shampiyona.

Shampiyona y'Ubwongereza Premier League yari igeze ku munsi wayo wa 12. Uyu ukaba ariwo wari umukino wa mbere kuri uyu munsi aho Leicester City ya Brendan Rodgers yari yakiriye Chelsea ya Thomas Tuchel.

Mbere y'uyu mukino Chelsea yari iyoboye urutonde rw'agateganyo rwa shampiyona ifite amanota 26 naho Leicester City yari iya 12 ifite amanota 15.

Ku ruhande rwa Chelsea abasore nka Romelu Lukaku na Timo Welner bari bataragaruka mu gihe ku ruhande rwa Leicester City Youri Tielemans yari adahari ndetse Kelechi Iheanacho na James Maddison babanje hanze.

Amakipe yombi yatangiye ashaka ibitego ariko ukabona ko Chelsea iri kugerageza uburyo bwinshi kurusha ikipe ya Leicester City.

Mu gukomeza kubona uburyo bwinshi bwabyara ibitego Chelsea yaje kubona corner ku munota wa 14' yatewe neza na Ben Chilwell maze myugariro Antonio Rudiger ashyira umupira neza ku mutwe. Muri uwo mwanya umuzamu wa Leicester City Peter Schmeichel  ntiyamenye uko bigenze Chelsea iba ibonye igitego cya mbere.

Chelsea yakomeje kugerageza gushaka ibindi bitego na Leicester City ikanyuzamo igakanga abafana ba Chelsea ko isaha n'isaha yakwishyura.

Akagozi kaje gucika ubwo ku munota wa 28' ku mupira mwiza Reece James yahaye N'Golo Kante yashutse ba myugariro ko ashaka gutanga umupira birangira ashose Chelsea ibona igitego cya kabiri ku busa bwa Leicester City.

N'Golo Kante yatsinze igitego(Image:433)

Iminota yakurikiyeho y'igice cya kabiri Leicester City yongeye kugerageza kubona igitego nyuma y'uko Kelechi Iheanacho na James Maddison bari bamaze kwinjira mu kibuga.

Ku munota wa 71' Chelsea yabonye igitego cya gatatu cyatsinzwe na Christian Pulisic ahawe umupira na Hakim Zyech bose bari bamaze kujyamo basimbuye.

Ikipe ya Chelsea kandi yatsinze ibindi bitego bitatu muri uyu mukino byangwa kubera kurarira.

Ikipe ya Chelsea ikomeje kuyobora urutonde rw'agateganyo rwa shampiyona y'Ubwongereza aho ifite amanota 29' ari nako itanga ikizere cyo kwegukana igikombe.