CAF yategetse Ishyirahamwe ry’Umupira w’Amaguru muri Kenya (FKF) kwishyura amande angana na miliyoni 2.5 z’amashilingi ya Kenya (angana na 27,948,859 Rwf).
CAF yaburiye Kenya ko hashobora kuza ibindi bihano nibaramuka bongeye gusubiramo aya amakosa mu irushanwa bakiriye bafatanyije na Uganda na Tanzania.
Nk’uko bigaragara muri raporo y’umukozi ushinzwe umutekano wa CAF, FKF, yarenze ku ngingo ya 82 n’iya 83 z’amategeko ahana ya CAF, ndetse n’amategeko y’umutekano nyuma y’uko hadutse akaduruvayo mu mukino Kenya yatsinzemo DRC igitego 1-0.
Ibyo Kenya yahaniwe:
- Akavuyo kabereye ku muryango wa 11 winjira muri sitade
- Moto yagaragaye ica hagati y’imbaga y’abantu mu buryo buteye impungenge
- Abafana bacanye umuriro
- Abakozi ba CAF n’abafatanyabikorwa bayo bangiwe kwicara mu cyicaro cy’abanyacyubahiro (VVIP)
- Abashinzwe umutekano basagariye bamwe mu bakozi ba CAF ndetse n'abaterankunga b’irushanwa
Uretse Kenya, Ishyirahamwe ry’Umupira w’Amaguru muri Tanzania (TFF) naryo ryaciwe $10,000 nyuma y’uko abafana barenze ku mabwiriza y’umutekano mu mukino wabo na Burkina Faso wabereye kuri sitade Benjamin Mkapa.
Ku mukino wa Kenya na Repubulika ya Demokarasi Congo hagaragaye akavuyo mu myinjirize biri no mu byo bahaniwe
Ikipe y'igihugu yabashije gutsinda iya Repubulika ya Demokarasi ya Congo
