Wari umukino wa mbere wo mu itsinda C mu gushaka itike y'Igikombe cy'isi u Rwanda rwari rwakiriyemo Zimbabwe, ukaba watangiye ku isaha ya saa 15:00 kuri sitade mpuzamahanga ya Huye.
Ni umukino wa mbere kandi umutoza mushya w'ikipe y'igihugu Amavubi Torsten Frank Spittler yari atoje, nyuma yo guhabwa aka kazi asimbuye Carlos Alôs Ferrer watozaga iyi kipe.
Abakinnyi b'Amavubi babanje mu kibuga
Abakinnyi ba Zimbabwe babanje mu kibuga
Iminota 30 ya mbere y'umukino yaranzwe no kwigana cyane ku mpande zombi ariko abasore b'Amavubi bakagerageza kwiharira umupira kurusha aba Zimbabwe, ariko ku mpande zombi ntabwo bigeze barema uburyo buremereye cyane imbere y'amazamu.
Gusa iminota 15 ya nyuma y'igice cya mbere umukino watangiye gushyuha amakipe yombi atangira gusatirana cyane bava ku izamu bajya ku rindi, ariko igice cya mbere cyarinze kirangira nta gitego kibonetse haba ku ruhande rw'Amavubi ndetse na Zimbabwe.
Mu gice cya kabiri Amavubi yarushijeho kotswa igitutu akomeza kwirwanaho ku buryo buremereye abasore ba Zimbabwe baremaga imbere y'izamu, ndetse ku munota wa 71 Munetsi atsinda igitego ariko umusifuzi aracyanga kuko habayemo kurarira.
Nyuma y'iyi minota minota abasore b'Amavubi bongeye gusa n'abakanguka nabo bagerageza uburyo bwashoboraga kubyara ibitego imbere y'izamu, harimo nk'amahirwe Manishimwe Emmanuel, Gitego Arthur n'abandi bagiye babona, ariko gushyira imupira mu nshundura birananirana.
Iminota 90 yarinze irangira nta kipe ibashije kubona igitego mu izamu ry'iyindi, amakipe yombi acyura inota rimwe. Ikipe ya Zimbabwe izongera gukina ku Cyumweru ubwo izaba ikina na Nigeria mu mukino uzabera i Huye, mu gihe u Rwanda ruzongera gukina ku wa Kabiri tariki 21 Ugushyingo, rukina na Afurika y'epfo mu mukino nawo uzabera i Huye.
Mugisha Gilbert ari mu bakinnyi bitwaye neza
Umutoza Torsten yacyuye inota rimwe mu mukino wa mbere atoje Amavubi
