AFCON:Comoros irakina na Cameroon idafite umutoza nta n'umuzamu n'umwe

AFCON:Comoros irakina na Cameroon idafite umutoza nta n'umuzamu n'umwe

 Jan 24, 2022 - 08:25

Ikipe ya Comoros igiye gukina na Cameroon idafite umutoza n'abazamu bayo bose kuko bari mu kato kubera Covid-19.

Mu ijoro ryo kuri uyu wa mbere ku isaha ya saa 21:00 nibwo Comoros iraba itangiye urugamba ruyigoye ku buryo bukomeye cyane bigaragara ko nta kizere cyo kurutsinda ifite.

Ikipe y'igihugu ya Comoros iraza kuba ikina na Cameroon yakiriye iri rushanwa ry'igikombe cya Afurika mu mikino ya kimwe cya munani, bishakamo ikipe igera muri kimwe cya kane.

Gusa ni umukino ugoye cyane kuri ibi birwa bya Comoros kuko iyi kipe y'igihugu yibasiwe cyane n'uburwayi bwa Covid-19.

Ibi byamenyekanye kuri iki cyumweru ubwo Comoros yajyaga gupimwa Covid-19, bagasanga abakinnyi bayo bagera kuri 12 ndetse n'umutoza mukuru bose barwaye Covid-19 bigatuma bahita bashyirwa mu kato.

Umuzamu wa mbere wa Comoros witwa Salim Ben Boina afite ikibazo cy'imvune, ndetse n'abandi bazamu bari bahari aribo Ali Ahamada na Moyadh Ousseni bari mu barwaye Covid-19.

Mbere y'uko igikombe cya Afurika gitangira, CAF yasohoye amategeko azagenga iri rushanwa ku cyerekeye Covid-19 aho bavuga ko ikipe ifite abakinnyi bagera kuri 11 igomba gukina kabone n'ubwo yaba nta muzamu ifite.

Ibi bivuze ko ikipe y'igihugu ya Comoros igomba gushaka umukinnyi usanzwe utari umuzamu ariko akaza gukina nk'umuzamu kuri uyu mugoroba.

Ishyirahamwe ry'umupira w'amaguru mu gihugu cya Comoros ryamaze kwandikira CAF basaba ko uyu mukino wasubikwa, ariko ntibarasubizwa. Gusa hashingiwe ku mategeko bigaragara ko igisubizo cyitarashimisha Comoros.

Ayo mategeko y'iri rushanwa kandi agena ko ikipe izanga gukina kandi ifite abakinnyi bagera kuri 11, izahita iterwa mpaga y'ibitego bibiri ku busa.

Comoros ifite ibibazo bikomeye muri AFCON

Cameroon yitezweho gutsinda Comoros kuri uyu wa mbere(Image:Aljazeera)