Wari umukino w'umunsi wa kabiri mu itsinda F wahuje ikipe y'igihugu ya Croatia na Canada kuri Khalifa Intetnational Stadium, ukaba wasifuwe n'umunya-Uruguay Andres Matonte.
Canada yabonye igitego hakiri kare cyane ku munota wa kabiri, ni umupira wavuye ku muzamu Milan Borjan awuhereza Tajon Buchanan, umusore nawe wahise ahinduramo imbere y'izamu Alphonso Davies atsinda igitego.
Alphonso Davies yatangiye akangura abanya-Croatia
Nyuma y'icyo gitego Croatia yahise itangira gusatira izamu rya Canada ishaka kwishyura ariko ubwugarizi bwa Canada bukomeza guhagarara neza. Akagozi kaje gucika ku munota wa 36 Andrej Kramaric yatsindiye Croatia igitego cyo kwishyura, ku mupira yari ahawe na Ivan Perisic.
Abasore ba Croatia bakomeje gusatira izamu rya Canada bashaka igitego cya kabiri, ndetse biza no kubahira mbere y'uko igice cya mbere kirangira Marko Livaja atsinda igitegi ku mupira yaherejwe na Josip Juranovic ku munota wa 44.
Mu gice cya kabiri Canada yagarutse iri hejuru igerageza gushaka igitego cyo kwishyura ariko Croatia yafata umupira ikagerageza uburyo bukomeye imbere y'izamu rya Canada.
Nyuma yo gukomeza gusatira izamu rya Canada. Croatia yatsinze igitego cya gatatu ku munota wa 70 gitsinzwe na Andrej Kramaric wahawe umupira mwiza na Ivan Persic.
Umukino urimo ugana ku musozo nibwo Croatia yabonye igitego cya kane cyatsinzwe na Lovro Majer wari uherejwe umupira na Mateo Kovacic, ubundi Croati ihita isoza umukino n'intsinzi ibyibushye.
Ubu mu itsinda F Croati ni iya mbere ifite amanota ane, ikurikiwe na Maroc nayo ifite amanota ane, Ababirigi bakaba aba gatatu bafite amanota atatu naho Canada yo yamaze gusezererwa ifite ubusa.
Umukino wa nyuma uzahuza Croatina n'Ububirigi, mu gihe ku rundi ruhande Maroc izaba isabwa gutsinda Canada ubundi ikerekeza muri kimwe cya munani.
Croatia yabashije kuva inyuma itsinda ibitego bine
